Vawiin khan India ram hmun dang rualin Champhai DC Conference Hall-ah Pu Vanlalngaihsaka, Champhai DC hovin National Voters Day vawi 7-na hman a ni.

National Voters Day hi inthlana vote nei ten vote an thlak ngei theihna tura inzirtirna hun atana Election Comission of India-in a duan a ni a. Vote nei chuan vote thlak ngei chu an mawhphurhna pawimawh tak anih thu khuallian Pu Vanlalngaihsaka, Champhai DC, District Election Officer ni bawk chuan sawiin kum 18 chin chunglam chu rokhawlhna dang a awm a nih loh chuan electoral roll-a awm vek tura tih a ni a. Electoral roll-a awm hian vote nei tihna ani a, vote thlak chu kan mawhphurhna a ni, tiin, vote khat hmangin ram roreltu thlan a ni a, mahni duhthlanna ngeia hruaitu neih theihna turin vote thlak ngei tur a ni a, mipui sorkarna, democracy a hlawhtlin theihna tura khua leh tuite chanvo pawimawh tak a nih thu a sawi.

Vote khat hian awmzia a nei hle a, India ram inthlan bikah pawh vote khat avanga hnehna chang sawi tur an lo awm tawh thin a, vote khat hian kawngro a su hle a ni, tih sawiin Pu Vanlalngaihsaka chuan Mizoram State Assembly inthlan hnuhnung berah khan Champhai District-a vote tla zat chu za zela 80 chuang a ni a, mi zawng zawngin vote an thlak lo tihna a ni a, vote thlak kawngah hian hmasawnna tur a la tam hle a ni, a ti a, Election Commission of India chuan vote nei tharte bakah hian vote la nei mai tur kum 15-17 te chu ngai pawimawhin vote an neih huna an mawhphurhna leh an hriat tur hrang hrang hrilhhriatna neih thin a ni, tiin, Electoral roll tihchhuah thar berah Champhai District-ah hian vote nei mi 825002 awmin heng zinga 7371 chu vote nei thar an nih thu a sawi tel bawk a ni.

Pu K. Lalhmuakliana, Election Officer in a kaihhruai National Voters Day puala inkhawmah hian Pu Remlalliana Hnamte, AERO, 24 Champhai South A/C hnen atangin CEC atanga thuchah ngaihthlak a nih bakah Pi Rebecca Laldinmawii Hrahsel, SDC chuan kalkhawmte chu vote thlak kawnga intiamna a neihtir a. Pu Lalremruata Kullai, AERO, 23 Champhai North A/C chuan SVEEP Campaign neiin Pu C.Lalzarliana, ERO 24 Champhai South A/C hnen atangin thusawi ngaihthlak a ni bawk.

He hunah hian Electoral Roll-a thun tharte hnenah EPIC pek chhuah niin Assembly Contituency tina BLO tithate hnenah chawimawina hlan nghal a ni.