Vawiin khan National Voters' Day vawi 7-na chu Lawngtlai DC Conference Hall-ah District Election Officer, Lawngtlai DC ni bawk Dr A. Muthamma IAS hovin hman a ni.

Dr A. Muthamma chuan vote nei tawh phawt chuan vote thlak hi kan dikna chanvo a nih mai bakah, kan mawhphurhna pawh a ni tel tih a sawi a. Vote tinin kawngro a sut vek avangin vote thlak chu kan tih ngei tur a ni, a ti. India ram democracy ropuina vawng him turin dik taka vote thlaka mi tha chauh thlan a tul tiin, thamna lak leh vote hralh chu tih hauh loh tur a ni, a ti a. EPIC neih paw'n E/Roll-a chuang lo tan chuan vote thlak theih a nih loh avangin, E/Roll-a hming chuantir ngei chu thil pawimawh tak a ni, a ti bawk. DC hian EPIC siam thar zawh hlim thenkhat a sem nghal a ni.

He hun hi Election Officer Pu Lallawmawma'n a kaihruai a. Report ngaihthlak niin, NVD thu tiam sawi rual a ni a. Electoral Registration Officer Pu H.Dolianbuaia leh political party hrang hrang ai awh te'n thu an sawi bakah, zaithiam zai ngaihthlak a ni bawk.

Final E/Roll-a a lan danin, tun dinhmunah Lawngtlai District chhungah voter 76649 (mipa 38161 leh hmeichhia 38488) an awm mek a. November 2016-a tlangzarh Draft Roll atanga Final Roll-a voter punna hi 1448 a ni a; 1.92%-a pung ang a ni.