Vawiin khan School Education Minister Pu H.Rohluna leh Parliamentary Secretary Pu Joseph Lalhimpuia te chuan New Delhi-ah Pu Prakash Javadekar Union Human Resources Development Minister chu a office-ah an hmu a. Hindi Teacher leh SSA hnuaia zirtirtute leh thawktu dangte hlawh pe thuai turin an ngen.

Union Minister hnenah hian SSA sum 2nd instalment pechhuak thuai turte, CSS Hindi Teacher-te hlawh hun rei tak an lak tawh loh chu pe thuai tur leh an service kum 10 dang chhunzawm (extend) tura an lo ngen tawhna tihhlawhtlinsak ngei turin an thlen a. Union Minister chuan SSA sum 2nd instalment chu rang taka sanction order tihchhuah anih tur thu a lo hrilh a. CSS Hindi zirtirtute hlawh leh an service kum 10 dang pawhsei chungchang chu Ministry-in a ngaihtuah mek thu a lo hrilh a ni.

Union HRD Minister an hmuh zawh vawiin chawhma dar 11:45 a.m khan Pu Anil Swarup Ministry of Human Resources Development Secretary chu a Office-ah Pu H. Rohluna te chuan an hmu leh a. Union Minister hnena an thu thlente a hlawhtlin theih nan theih tawpa tan lo lakpui turin an sawipui a. Mizoram sorkarin a tum tur (matching share) a pek vek tawh hnua Central-in a tum tur (central share) a pek tlai avanga a kaihhnawih zirtirtuten hlawh an la tlai thin hi a huna an lak theihna tura tan lakpui turin an ngen bawk a. Secretary chuan theihtawp a lo chhuahpui tur thu a lo hrilh a ni.

Pu H.Rohluna leh Pu Joseph Lalhimpuia hi Pu Arvind Ray Principal Residence Commissioner, Pu Uma Kant Officer on Special duty leh Pu Lalchungnunga Dy Director, School Education ten an tawiawm a ni. Minister leh Parliamentary Secretary te hi sorkar thil pawimawh buaipuiin New Delhi-ah an la cham dawn a ni.