India ram hmun dangte rualin vawiin khan Naupangte Ni, Childrens’ Day lawmna hun chu Kahrawt Field Champhaiah hman niin, naupangte pual hapta tan nghal a ni. He hun District Child Protection Unit leh District Legal Services Authority, Champhaite tangkawp buatsaihah hian Pu S.L Naveen, IAS Deputy Commissioner Champhai chu khuallian a ni a, Naupangte Ni puala kawngzawh a vailiam a ni. 

Bawrhsap Pu S.L Naveen chuan Champhai District chhunga naupangte Childrens' Day lawmpuina hlanin chibai a buk a. Naupangte ni chu India ram pumah kumtin November Ni 14 a hman thin anih thu sawiin, India ram Prime Minister hmasa ber  Jawaharlal Nehru hriatrengnana a  pianchamphaphak November Ni 14 hian kum tin hman thin a ni, a ti a. Naupang duhawm tak takte chu nakin lawka Mizoram mai bakah India ram tana nghahfak leh  chhenfakawm tak takte an ni tiin, nakin lawkah chuan zirthiamna hian thachakna khumin kawng engkimah hma a la hruai dawn a ni, a ti a. Naupangte chu zirna ngaipawimawha dah pawimawh hmasa ber tura fuihin, khawtlang tana chhawrnahawm leh rintlak ni thei tura inenkawl tha turin a fuih a. Ruihhlo leh a kaihhnawih laka naupang leh thalaite zirtirna  Project HIMNA-MADAT (Mizoram Against Drugs, Alcohol & Tobacco) chungchang sawilangin, naupang rilru   thianghlim tak pute chu damdawi hmansual leh ruihhlo dang laka inthiar fihlima, humsual dai lova nun kawng hrisel zawh  zel  turin a chah a. Rilru put hmang dik leh mawi tello chuan eng zir thiamna mah hian awmzia a nei tak tak lo a ni tiin, Kohhran, khawtlang hruaitu leh NGO hrang hrangte’n naupang leh thalaite nunkawng dik kawhhmuh tura an thawhhlawk zia  a hriat thu leh fakawm a tih thu a sawi a. Naupangte chu an puala hun hman mek  hlim leh lawm taka hmang tura chahin, an kalzelna atan duhsakna a hlan nghal a ni. 

Vawiin Children’s Day lawmna hun hi Pi R.Lalrinchhani, District Child Protection Officer, Champhai chuan a kaihruai a. Naupangte hnenah he hun hmanpui tura sawm bik te’n thil pek an hlan a. He ni pual hian Kahrawt Field atanga DK Traffic Point, Vengthlang thlenga kawngzawh niin, Darthangvunga Traffic Point Vengthlang leh DK Traffic Point, Vengthlangah te inzirtirna hun tawi buatsaih a ni a. Darthangvunga Traffic Point-a hun hmanah ‘Kangmei ven kawnga hriatturte’ tih thupui hmangin Pu Thanliana Hauhnar, Range Officer Champhai leh ‘Faina kawnga hmalakna’ tih thupui hmangin Pu F.Lalhriatpuia, JE, UD&PA Champhai te’n zirtirna an pe a. A kharna hun DK Traffic Point-a neihah naupangte venhimna kawnga hriatturte Pi R.Laltrinchhani, DCPO hnen atanga ngaihthlak anih bakah, naupang venhim kawnga dan hriattur   chungchanga inzirtirna Pu PC Vanlalruata, DLSA chuan a nei bawk a ni.

Naupang pual hapta hmanna kalzelah November Ni 19, 2019 (Thawhlehni) hian Rohmingliana Recreation Centre/Children’s Park, Kahrawt-ah Children’s Carnival neih a ni dawn a. Infiamna leh ennawm hrang hrangte entir ani ang a.  November Ni 21, 2019 (Ningani) hian I&PR Auditorium, CHANEM Building-ah ngaihsak leh duat bik ngai naupangte pualin hun hman a ni bawk ang.