Vawiin chawhma dar 11:00 khan Mizoram State Flagship Programme NLUP Second Phase sem runpui Champhai Town Hall-ah neih a niin, he hun hi Champhai North & South bialtu MLA Pu TT. Zothansanga leh Minister Pu JH Rothuama ten an hmanpui.

NLUP 2nd Phase sem runpui, Champhai DC Pu Lalthangpuia Sailo kaihruaiah hian Revenue MinsiterPu JH Rothuama chuan ‘Ram leilung tlawh chhana chhungkaw tinin eizawnna nghet an neih theihna turin NLUP chu kalpui anih thu leh kum 5 chhungin chhungkaw 1,35,000 ten he hamthatna hi dawng hman turin hmalak a nih thu sawiin, September thla tir hian NLUP 3rd Phase sem anih tur thu a sawi a, sorkar laipui atangin Rs 370 Crores dawnfel tawh anih thu leh thliar bik awm lovin he Programme tuipuitu leh tih hlawhtlin tum apiangte hnenah sem anih tur thu tarlangin, hlawh tlinpui tum lo leh sorkar hmalakna tih mualpho tumte hnenah pek a ni lovang’, a ti.

NLUP hian chhungkawtin mahni luhchilh ruamah eizawnna nghet a siam dawn vangin, ramngaw humhalh kawngah kori a tu hle dawn a, chu chuan sik leh sa inthlak danglam tur a ven theih dawn vangte, leitha vawnhim leh nungchate venhimna kawngah nasa taka a tanpui dawn vangin khawvel mithiamte pawhin an tuipui a, a hlawhtlin ngei theihna turin an thiam leh finna Mizoram tan an thawh mek tih sawiin, Mizoram in he Programme a kalpui mek hi India ram State dangte pawhin ngaichangin an thlir mek a, kan hlawhtlinpui dan a zirin kalpui ve an tum mek a ni, a ti.

Land Revenue Department in dan thar a siam chu hman zui nghal tur a nih thu sawiin, mimal in ram Bigha 30 aia zau neih theih anih tawh dawn loh thu leh huanthlai chingte leh hmala tha tan erawh ram Bigha 50 aia zau pawh pek theih anih tur thu sawiin, sorkar in mirethei te dinchhuah tir chu a tum ber a nih angin sorkar sum tam ber hi mipui hnenah a luanglut a ni a ti.

Champhai North Bialtu MLA Pu TT Zothansanga chuan ‘Mi rilru nei leh tumruhten NLUP hi an dinchhuahpui dawn a, rinawm taka eizawnna nghet luhchilhtute hnenah an hlawhtlin hma chhawmdawlna siamsak turin NLUP Exit Protocol buatsaih a ni’ a ti a, mi hlawhtlingten dinchhuahna atan an hman hunah he huntha dawngdah taka hmangliamtu chhungkuate chu hun lo kal turah an tu leh fate chhalh anla tawk ngei dawn tih sawiin, sorkarin a mawhphurhna a hlenchhuak thawkhat tawh angin, tunah chuan mipuiten an mawhphurhna an hlen chhuah ve a hun ta a ni, a ti.

Food Security Bill chungchangah bihchian leh zirchian ngai a awm vangin Mizoram sorkar in a ngaichang hret a, he scheme hian mipui 65% vel tuamin, mi pakhatin thla khat ah Kg 5 buhfai a la dawn a, tunah hian mi pakhat in kg 8 Fair Prizeshop-ah lak a ni a, FSB-ah a man chu tlawm mahse, Kg 5 hi thlakhat chhung kham anih dawn loh bakah Fair Prize shop hi tihtawp anih tawh dawn vang leh mahni chanvo khamlo tan Bazarah rate to takin Buhfai lei atul tawh dawn a, kan tan a tha ber tur hi chhut chian phawt atul a ni, a ti.

Vawiina NLUP 2nd Phase sem runpui-ah hian Line Department hrang hrang atanga NLUP dawngtute hnenah hamthatna pek chhuah a niin, Champhai District chhungah NLUP Second Phase dawng tur chhungkaw 6800 vel thlan chhuah a ni a, Sub-Deputy Commissioner leh NLUP Nodal Officer Pi Rochuangkimi Khenglawt in hun kharna leh lawmthu sawina a nei.