NLUP hmanga  hlawhtlinna hrang hrangte phochhuahna leh zawrhchhuahna hun NLUP Fair-cum- Exibition-2018 chu vawiin khan Kahrawt Communiy Hall hnuai leh Vanlallawma Indoor Stadium (VANIS), Champhai Kahrawt-ahte neih a ni. NLUP Kutpui hawnna hunah hian Champhai North bialtu MLA Pu TT Zothansanga chu Khuallian niin, NLUP Kutpui hawnna a nei a ni. He hunah hian Pu James Lalrinchhana Secretary, NLUP Implementing Board (NIB) chu khualzahawm a ni.

Khuallian chuan Mizoram sawrkar flagship programme pawimawh tak NLUP hlawhtlinna phochhuah leh zawrhchhuahna hun Kutpui buatsaih a ni chu lawmawm a tih thu a sawi a. Line department hrang hrangte thahnemngaihna leh thawhrimna chu fakawm a ti a. Rambuai avanga eizawnna mumal nei lova hun rei tak kan awm hnuah NLUP hmangin leirem rah leh theihna tura tan lak mek zel niin,   remna leh muanna tha tak hnuaiah hmalam pan mek zel a ni, a ti a. NLUP kaltlangin mi thawkrim leh taima, rinawm taka thawk thinten leirem an rawn rap   chu  hlawhtlinna  duhawm tak a nih thu a sawi a. NLUP kaltlangin Agriculture Link road siam kawngah tan lak a ni a, khawchhak tlang dungah hmasawnna hmuh theiha  a awm thu a sawi a. Ram hmasawnna leh kalzelna turah hriselna tha neih a tul thu sawiin ,tunhnai lawka sawrkar laipuiin Mizorama Medical College hmasa ber tur MIMER din phalna a rawn pe chu rahbi thar chhinchhiah tlak tak a ni a, hei hian State pawna sum tam tak luangchhuak tur a tih ziaawm dawn thu a sawi a. Tin, hemi bakah hian hmasawnna ruhrel pawimawh tak kawlphetha lama intodelh theihna turin Tuirial Hydel Project pawh thar thawh leh anih hnuah chhawrtheiha hawn anih tawh bawk thu a sawi a. Sawrkar hlawhtlin theihna chu a hnuai  thawktute an ni tiin, Line Department hnuaia thawktute chu mi rethei leh chanhai zawkte khaichhuahna kawngah theihtawp chhuah turin a chah a ni.

Khualzahawm Pu James Lalrinchhana chuan hun chep tak kara NLUP Kutpui buatsaih ani thei chu lawmawm a tiin District level Committee leh line department hnuaia thawktute chu fakawm a tih thu a sawi a. NLUP Kutpui chu ngaihtuahna zau tak nena hman a tul thu sawiin, NLUP Kutpuiah hian NLUP tharchhuah leh a kaihhnawih  siam dangte pawh pholana  zawrchhuah  thin a ni, a ti a. Aizawla NLUP Kutpui hman anih dan   tlangpui a sawi lang a. NLUP Kutpui chu District zawnga zawngah hman anih dawn thu leh Kuthnathawktute Ni hranpa siam lova hman mai nise ti a rel anih thu a sawi a. Line Departmen tina thawktute chu tang mar reng tur leh an thawhsakate hmakhua hrereng turin a chah a. NLUP chu miretheite leirem rah theihna tur leh leilung mil, thing leh mau leh nungchate humhalhna tura duan a ni, a ti a. Environment humhalhtu pawlte nen pawha thawhdunna an neih thu leh Zothei huan 120, Square Kilometre 5000 chuang humhalh anih thu a tarlang a. Miten NLUP an hriat dan mai piah lamah hian NLUP hmang hian hna tam tak thawh anih tawh thu a sawi a. UNO hnuaia Agency 4-te nen thawhhona neih anih  thu leh hemi kaltlang  hian hmasawnna hrang hrang kalpui mek a nih thu a sawi a. Heng bakah hian Forest hnuaia Scheme te kalpui anih thu leh Sir Ratan TATA Trust-nen pawha thawhdun anih thu a sawi a. Boruak muanawm tak hnuaiah kuthnathawktute thawhrinmna rahchhuahte hlutpuia, Kutpui nuam tak hmang  turin duhsakna a hlan a ni.

Vawiin NLUP Kutpui hawnna hun hi Champhai District Bawrhsap Pu Vanlalngaihsaka chuan a kaihruai a. NLUP chu Sawrkar flagship programme miretheite leirem rah vena tur a duan leh thing leh mau, ramngaw leh nungchate humhalhna tura duan anih thu a sawi bawk. Pi Laldinfeli, SDC/Nodal Officer,NLUP in kalkhawmte lawmna thu leh NLUP Kutpui buatsaih dan report a pe a ni.

NLUP Kutpui Champhaiah hian Line Department hrang hrangte atangin Stall 18 bakah  I&PR Department atangin Stall 2 leh Hnam Chhantu Stall 1 te hawn a ni a. Heng bakah hian Food Stall leh DC Office Stall-te pawh hawn a ni bawk. Tun dinhmunah Champhai District chhungah hian NLUP hamthatna dawngtu beneficiary 17,352 an awm mek a ni.

Vawiin NLUP Kutpui pual hian Line Department hrang hrang hnuaia thil thar chhuah leh siamchhuahte chu man tlawm zawk discount price a hralhchhuah a ni a. Thei, Thlai, Buh, Arsa, Sangha, Se sarep, Bawnghnute, Hmunphiah, Silk atanga thilsiam chhuahte,  Industries  hnuaia thil siam hrang hrangte chuan hlut a hlawh hle a ni.   AH&Vety Department hmalaknain Free Animal Clinics buatsaih anih bakah NLUP Sial hmuhtheiha pholan a ni bawk a. Forest Department-in Mau hrang hrangte entirna an nei a. NLUP hlawhtlinna pholanna Photo Exibition leh Video Show-te pawh neih a ni bawk a. NLUP Kutpui hian hlut a hlawhin tlawhtu pawh an thahnem hle a ni.