Vawiin khan National Students Union of India (NSUI) Champhai District buatsaihin Champhai District atanga HSLC leh HSSLC Distinction-a pass leh Topper chawimawina hun Champhai Venglai Community Hall-ah neih a ni. He hun hi Pu TT Zothansanga, Champhai North Bialtu MLA chuan khuallian niin a hmanpui a ni.
Khuallian chuan Zirlai hlawhtlinna changte chu a lawmpui thu sawiin, intlansiakna bei mek ang an nih avangin, inthlahdah lova tang mar reng turin a chah a. Lehkhathiam thei apiang an hlawhtlin vek bik loh thu leh theihtawp chhuah thin mi leh teirei peihte chu a tawpa hlawhtlinna tlanga ding thinte an ni, a ti a. Inelna sang tak khawvela leng mek Zirlaite chu zirlaibu chhung mai bakah hriatzauna Lehkhabu dangte zir tel ve zel thin tura fuihin, thawklehkhata zir vak ai chuan muangchanga inthlahdah hauh lova zir a tha zawk a ni, a ti a. Pawl 10 leh 12 result tha neih chu hlawhtlinna tluantling a la nih rih lova, tehna pakhat, rahbi intanna chauh anih avangin Zirlaite chu nun dan dik leh mawi zawh turin a fuih a. Nu leh pa thuawiha an hmuhphaklohah pawh taihmakna, tumruhna leh rinawmna nunpui zel a tul thu a sawi a.
Pu TT Zothansanga chuan Champhai District-in Zirlai beiseiawm tak tak aneih thu sawiin, Ziralite chu an zirlai aia thildang dah pawimawh hmasa lo turin a chah a. Zirlai la peng thei thil ang chi reng rengte pumpelh angaih thu leh khawtlang leh kohhranahte pawh Zirlai tibahlah phah khawpa inhman rih loh a that thu a sawi a. Zirlai nih chhungin Social media hman chin tawk thiam a tul thu leh nulat tlangval lamah pawh hawiherh lutuk rih loh chu a finthlak thu a sawi bawk a. Khuallian chuan Zirlaite chuan harsatna an neihin hotute leh amah ngei pawh pan hreh lo tura hrilhin, a tih theih angah chuan tanpui a inhuam reng thu a sawi a. Zirlai Nu leh pate thawhrimna chu fakawm a tih thu a sawi a, chawimawina dawng Zirlaite chu nakin lawka hlawhtlinna tak tak leh tluantling chang ngei thei tura tan la zel turin duhsakna a hlan a ni.
Vawiin Zirlai tithate chawimawina hun hi Pi Khawllianthangi, President District NSUI-in a kaihruai a. Pu JH Laldawngliana, General Secretary, District NSUI-in report a pe a. Pu Valalchhuanga, Pu Lalhmachhuana, President, NSUI Hqtrs leh Pu Lalramngaihzuala, Secretary, MZP Sub-Hqtrs. Champhaite pawhin zirlaite fuihna thu an sawi bawk a ni. He hun hi Pu B.Rothangvunga, Vice-President, District NSUI chuan lawmthu sawina hun hmangin a khar a ni.
Vawiin hian HSLC distinction-a pass Zirlai 88 leh HSSLC Distinction-a pass Zirlai 12, an vaiin Zirlai 100 te hnenah chawimawina Citation hlan a ni a. Mizoram puma HSLC result puan taka pakuana dinhmun hauhtu JK Malsawmzeli D/o J. Lalrotluanga, PES Khawzawl Vengthar hnenah Khuallianin chawimawina Citation leh Laptop a hlan nghal bawk a ni.
