National Urban Livelihood Mission (NULM) hnuaia Self-Employment Programme (SEP) loan diltute interview chu vawiin khan Champgai UD&PA Office, CHANEM building-ah neih a ni.

Interview-ah hian Pu C.Lalzarliana, Addl DC; District Task Force committee member-te leh Bank hrang hrang manager-te an thu a. Addl DC chuan he loan hi BPL loan a ni a, thenkhatin BPL loan chu rulh that loh tur emaw kan ti thin a. Mahse loan reng rengah rulh that loh tur a awm ngai lova, SEP loan leh mi harsa zawkte hamthatna tura loan pek chhuahah hian loan pangngai aiin a rulh zat tur a tlem zawk chauh a ni a ti.

Vawiin interview-ah hian mimala he loan dilte interview neih a ni a. State Bank of India-in target 5 neiin diltu mi 20 an awm a, HDFC-in target 3 neiin diltu 10; Canara Bank-in target 2 neiin diltu 9; MRB-in target 15 neiin diltu 54; MCAB-in target 15 neiin diltu 55 an awm a ni. Mimala dilte hnenah hian Rs.5000/- thleng pek tur a ni a, bank loan punna (interest) 7% chin chunglam chu UD&PA Deptt in a tum dawn a ni.

Naktuk hian Group leh Self Help Group (bank linkage) te tan interview hi neih chhunzawm leh tur a ni a. Group-ah hian SBI in target 5 an nei a, HDFC in 2, Canara Bank in 1, MRB in 10 leh MCAB in 11 neiin, loan hi cheng nuai 1 pek chhuak tur a ni a. Pawl bakah SHG ten an dil a ni. SHG (bank linkage) ah hian SBI in target 5 an nei a, HDFC in 3, Canara bank-in 2, MRB in 15 MCAB in 10 an nei a, Self Help Group bank te bank account-a pawisa awmzat let li thleng loan hi pek chhuah tur a ni a. Hemi atan hian UD&PA chuan Self Help Group-te chu bank account an lo hawntir tawh a ni.