Lawngtlai District Bawrhsap Pu J. Hmingthawnmawia chuan vawiin hian DC Conference Hall ah Lawngtlaia Commercial Vehicle neitu Joint Action Committee hruaitute chu kawmin Dt 15 – 17 chhunga Lawngtlai khaw chhung leh Lawngtlai a luh tum lirthei zawng zawng dan an tum chung chang a sawi pui.

Bawrhsap Pu J. Hmingthanmawia chuan, Lawngtlai panna kawngpui National Highway siam thatna tura hma lak tawhna hrang hrangte tarlangin, Lunglei to Lawngtlai Highway chu Contractor ten hna thawh an tan tawh a. Tunah pawh Lawngtlai atanga tanin an thawk mek a ni, a ti. Ruahte a tlak rei avangin tum anga hnathawh chak a har thu pawh sawi langin chuti chung chung chuan mipuiten an mamawhna hriain hna hi a theih ang anga thawh a ni, a ti.

Heng bakah hian Joint Action Committee ten an phut dang Lawngtlai to Parva via Diltlang pawh 71 Road Construction Company, Border Road Organisation te hmalak dan an aiawha lokal in a sawifiah bawk a. Tunah hian kawng tha tawklo laite chu an then fai mek thu a sawi a ni.

Lawngtlai to Kawlchaw inkar pawh a enkawltu PWD ten, tunah hian a thawhna tur pawisa a lo thleng tep thu leh, a thlen ruala an thawh nghal tur thu an sawi a. Tunah pawh duty an indah reng thu an sawi bawk a ni.

Lawngtlai khawchhunga motor lianin a tai theih khawpa hniama Electric hrui, Telephone hrui, Cable TV hrui zam te pawh Bawrhsap in hma a lak tur thu sawiin Cable Operator te, Telecom lam te leh Electric Department hotute chu a hrana a kohkhawm tur thu a sawi a. Kawng sira Motor Parking fel zawk a awm theih nan leh kawng dipa bungraw dahkhawl a awm loh nana hmalak mek dan Pu J. Hmingthanmawia hian a hrilhfiah bawk. Superintendent of Police pawhin kawng sira lirthei dah chungchangah, a bikin FCI Godown kawng sira zana lirthei riah thin hote pawh felfai zawka hmalak dan ngaihtuah nghal a nih tur thu a sawi bawk.

Hengte bakah hian naktuk Dt 13.10.2015 hian Lunglei to Lawngtlai kawng hnathawh mek chu a huhova a hmun ngeia tlawh tha an ti a, Joint Action Committee hruaitute pawhin sawrkar atanga hma lakna tak tak hmel hmuh kan duh a, chutiang hmalakna hmuh tur a awm a nih chuan, kan thil tumte pawh sut har lutuk a nih loh tur thu Bawrhsap hnenah hian an thlen a ni.

He Meeting ah hian Bawrhsap hi Superintendent of Police Pu Lalsanglura'n a tawiawma an ni bakah hian Joint Action Committee hruaitute leh kawng siam hnathawktu Contractor te, PWD hotute, 71 RCC hotute leh Cable TV neitute an tel a ni.