Reserve Bank of India(RBI) Central Board Meeting vawi 554-na Aizawla neih tur chungchangah vawiin khan Chief Secretary Pu Lalmalsawma hovin Chief Secretary’s Conference Hall, New Secretariat Complex-ah meeting pawimawh neih a ni.
Tarlan tawh angin October ni 14 atanga ni 16 chhung hian RBI Governor Raghuram Rajan hovin RBI mi pawimawh engemawzat an lokal dawn a. Central Board Meeting hi Hotel Floria-ah October ni 15 hian neih a ni ang. RBI Central Board Meeting hi India ram chhung State hrang hrang khawpuiah neih kual thin a ni a, India hmarchhak khawpui zingah Aizawl hi he meeting thleng thei pahnihna a ni.
Board Meeting bakah hian October ni 15 hian RBI Governor Raghuram Rajan leh Mizoram Chief Minister Pu Lal Thanhawla’n RBI Sub-Office thar, F.Kapsanga Building, Dawrpuiah an hawng ang a. Hemi ni vek hian Special State Level Bankers’Committee (SLBC) meeting-ah a tel bawk ang. RBI Governor hian hemi tlai hian Assembly Annexe Building-ah thuthar thehdarhtute a kawm dawn bawk a ni.
Ruahman lawk dan chuan RBI Governor hian October ni 16 ah Mizoram University zirlai leh zirtirtute nen inkawmhona hun an hmang ang a. Hemi ni vek hian Mizoram a chhuahsan ang.
RBI Governor Raghuram Rajan leh a thawhpui mi pawimawhte cham chhung October ni 14 atanga 16 thleng hian Hotel Floria kawt atanga Zion Street pan thlakna bul taxi stand bakah Bazar Bungkawn atanga Zodin Square inkarah lirthei eng chi mah park phal a ni lo.
