Kumin 2015 hian kum dang aiin Lunglei District-in ruahtui a dawng tam a, harsatna chi hrang hrang a thlen mek chungchangah District Agriculture Officer,Lunglei chuan a hnuaia mi ang hian thuchhuah a siam :

Kumin Lunglei District-ah ruahtui tam lutuk hian hmun hrang hrangah leilet a khawih chhe nasa hle a, tuikawng bal (leimin) te, leilet chhia te, leilet tuiin a chim leh tiau lung a chhun luh te a tam hle.

Leilet te hi luite kama awm an nih thin avangin ruah bawhawk leh tui tam thut hian a ti chhe awlsam hle a, leilet pumpui chhia chu a awm lo niin a lang a, amaherawhchu a tihchhiat hi loneitute tan chuan siam that leh mai a harsa hlawm.

Loneitute buh thar hi District Agriculture Office-in a enfiah dan chuan 20%-30% in a chhiat phah thei ang. Tlabung lamah chuan 100% chhia te pawh a awm thung.

Ni 10.10.2015 (Inrinni) khan DAO Pu J.Rothanga chuan Haulawng khuaa Huisih zau a tlawh a, hetah pawh hian loneitu mi 18 zingah mi 10 velin tuilian hi an tuar a ni. Tin, ruahtui tam lutuk leh boruak hnawng lutuk avangin buh natna leh eichhetu rannung a pung nual bawk a, hei pawh hian harsatna nasa tak a thlen bawk.

Thingfal, Ngengrual leilet neite zingah mi 2 ram chu tuilian hian vawi 2 lai chimin a chhe hle a. Bial thenkhat phei chu Tiau tam takah a chang nghe nghe a ni.

Tiperaghat, Lamthai, Kalapani chhehvel khaw thenkhatah te pawh tuilian hian leilet tam tak a tichhia a ni.