‘Right to Information(RTI) Week’ chu vawiin khan Lunglei-ah Khuallian Lunglei DC Pu Ashish Madhaorao More, IAS hovin Sub Hqrs YMA Conference Hall, Venglai-ah he Week puala inkhawmna neih a ni a; District Heads of Offices leh officials dangte bakah MJA, NGO hrang hrang, Mizo Zirlai Pawl leh political party aiawhte an tel.

RTI Week 2015 puala inkhawm Lunglei DIPRO Pi Mina Zoliani kaihhruaiah Lunglei DC Pu Ashish More chuan RTI Act hi sorkar laka lungawilohna neite zualkona tura siam a ni lova, sorkar hmalakna hrang hrang tha zawk leh dik zawka kalpui a nih theih nana sorkar khalh ngil tura tangkai taka hmanna tur a ni zawk, a ti. India ramah kum 2005 atanga RTI Act hman a nih atanga vawiin ni thlengin he Act hi mipuiin kan chhawr tangkai thiam chho zel a, ram Danpuiin a mipuite intluktlanna leh zalenna chanvo a pek theuh humhalh nan he Act hi a tangkai a. RTI Act hmanga zawhna dawngtu department-te pawhin RTI Act hi dah pawimawh thiam a, inthlahdah lova, a hun tak zelah zawhnate chhang turin officials kalkhawmte a chah a. RTI Act hian mipuite kutah thiltihtheihna namen lo a pek rualin sorkar department ten theihtawpa chhanna an pek tawh hnu pawh a lungawi zo lo leh tul lo khawpa zawhna zawt zawngchhang an awm thin chu a dik bik lo tih sawiin Pu Ashish More chuan hetiang mi an tawng a nih chuan tawngkam thain hrilhfiah tur a ni, a ti. Mipui chanvo leh hamthatna siam thin ram (welfare state)-ah te chuan RTI Act hi an nei deuh vek tawh a, India ramah pawh he Act hi hman a nih hmain Karnataka leh Delhi-ah te chuan a hranpain hman a lo nih tawh thu a tarlang bawk. Ram leh mipuite hmasawnna tura sorkar sum hmandan dik leh dik lo chhui nan he Act hi tupawhin an hmang thei a, a bik takin media lama thawkte chuan sorkar hmalakna hrang hrang leh hlawhtlinnate chu he Act hmang hian an zirchiang thei a, mipuite beng pawh an tivar thei a ni, a ti bawk.

Vawiin RTI Week 2015 hmannah hian Lunglei BDO Dr.Malsawmtluanga Fanchun leh Lunglei SDPO Pu B.Laldingngheta ten RTI Act chungchang zirtirna an pe a, kalkhawmte nen zawhna leh chhanna hun tha tak hman zui a ni a. ‘RTI Act hi sorkar dik leh langtlang a siam a ni’ tih thupui hmangin Mizo Zirlai Pawl ten Debate an huaihawt bawk a, debate lawmman hi Khuallianin a sem nghal a ni.