535/2023-2024

Champhai, the 22nd May, 2023: Vawiin chawhnu dar 3:00 khan NIC Conference Hall, Champhaiah Common Service Centre (CSC) kaltlanga Online hmanga Certificate pawimawh hrang hrangte pek chhuah kawnga hmalaknate leh bawhzui tul chungchangte sawihona hun District Bawrhsap Pu James Lalrinchhana hova neih a ni. Online hmanga Champhai District chhunga CSC Supervisor-te nena meeting neihah hian certificate buaipuina man lak chungchangte, Sawrkara revenue chhungluh chungchangte, certificate pekchhuah buaipui kawnga hmasawn ngaihna laite leh tul dangte sawiho a ni.

Bawrhsap Pu James Lalrinchhana mipuite'n awlsam zawka hna an thawh theihna tur leh awlsam zawka certificate pawimawhte an hmuh zung zung theihna turin Sawkarin theihtawp a chhuah thu a sawi a. Hemi kawnga hna pawimawh hmasa thawktu Common Service Centre Supervisor-te'n chanvo pawimawh tak an chelh thu sawiin, mawhphurhna sang tak nei an nih avangin fimkhur tak leh dan anga thawk turin a chah a. Harsatna an neihte Sawrkarin a ngaih pawimawh thu sawiin, mipui hmakhua ngaia DC Office leh CSC te inkara inremna Service Level Agreement (SLA) zaha hemi anga kal zel tur a nih thu a sawi a. Champhai District chu ramri depa awm District pawimawh tak a nih thu tarlangin, CSC Supervisor-te chu DC Office peng pawimawh tak an ni tih inhriaa rinawm leh zahawm taka hna thawk tur leh diklo nia an hriat rilru fim tak puchunga hnar ngam tur te, harsatna an neihte DC Office-a thlen hrehlo turin a chah nghal bawk.

He hunah hian DC Office leh Common Service Centre (CSC) te inkara inremna, Service Level Agreement (SLA) anga Certificate hrang hrang (Scheduled Tribe, Residential leh Income Certificate) buaipui nana processing fee CSC in a lak tura bituk, Certificate pakhat zela Rs 30/- lak tura tih chu Sawrkar dan dinglai a nih anga zawm rih phawt a tul thu tarlan a ni a. CSC thawktute hnen atangin sawi duh an neihte ngaihthlak a ni a; harsatna an tawhte mipui hmakhua ngaia ngaihtuah zui tum a ni.

Certificate pakhat siamna atanga CSC-in pawisa a lak Rs 30/- atanga Sawrkara revenue an chhungluh ve tura bituk Rs 10/- chu karhnih dan zela DC Office e-district designated bank account-ah chhungluh zel tura tih an ni a. CSC te chu revenue chhunluhna tur bank acount number hrilhhriat leh vek an nih tur thu leh hunbi ang thlap, thla tin ni 15 leh 30-naah zel revenue chhunglut tura beisei an nih thu tarlan a ni a. Revenue chhungluh tur la chhunglut kimlote chu tun thla chhung ngeia chhunglut vek tura chah an ni bawk.

Heng bakah hian Certificates pawimawh tak takte pekchhuah kawnga duhkhawp lohna awmte leh hmasawn ngaihna laite sawiho a ni a. Document lem dapchhuah kawnga thawhho theih dan turte pawh sawiho a ni bawk.

Meeting-ah hian Addl. DC Pu M.Misael, SDO Sadar Pi V.Lalmuanpuii, Official pawimawh dangte leh CSC Supervisor-te an tel a ni.