534/2023-2024

Aizawl, 22nd May, 2023 : Vawiin khan FCS&CA minister Pu K Lalrinliana hovin Hon'ble Minister, FCS&CA a pisa ah Indian Oil Corporation Ltd (IOCL) leh sawrkar department dangte nen Sihhmui a railfed oil depot din tur chungchang sawiho a ni.

He sawihona ah hian oil depot siamna tur atana ram lak turin a kaihhnawih tihfel ngai te sawiho a ni a. Oil depot ram tura High Tension Line kal te sawn dan tur ruahmanna leh hmalak tawhna chu Power Grid Corporation India Limited in report an pe a, PWD lamin a kalkawng tur zauh dan leh a kawng siam that dan tur ruahmanna awm te leh an hmalakna te an sawi bawk a, Geology & Mining lamin a hmun an survey na report pe in a ram leilung awm dan zirchianna leh a ngheh leh ngeh loh chungchang te report an pe bawk a ni.

IOCL Deputy General Manager Pu Deepak Kumar Pathak chuan ram lak tura tihfel ngai hmasa te chungchangah Mizoram sawrkar hmalakna a that thu leh a lawm thu a sawi a, ram lak fel thuai a nih theih nan IOCL hian Mizoram sawrkar hnenah a rang lamin lekha an siam tur thu a sawi a ni.