3201/2024-2025

Champhai, 26th November 2024: Sawrkar laipuiin Tribal-te hmasawnna leh hamṭhatna tura a ruahman PM DAJGUA pual Information, Education & Communication (IEC) Campaign kharna hun chu vawiin khan Govt. GM Higher Secondary School tualzawlah hman a ni a. Champhai Bawrhsap Pu VL Remliana chuan khuallian niin he hun hi a hmanpui.

Pu VL Remliana chuan India ram chu ram changkang (developed country) a lo nih theih nan sawrkar laipuiin hma nasa takin a la mek tih a sawi a. He tum ram thleng tur hian mitinte hnena hmasawnna thlen (Development for All / Sabka Saath, Sabka Vikas) a pawimawh avangin, ruahmanna ṭha tak tak siam ṭhin a ni, a ti. Champhai Bawrhsap chuan heng ruahmannate hi a lo hlawhtlin theih nan mitinin mawhphurhna kan neih thu sawiin, sawrkar hnathawk, khawtlang hruaitu leh zirlai te chu an hma zawn ṭheuhah ṭan la turin a chah a ni.

Pu VL Remliana chuan Mizo ten British sawrkar lo dodala zalenna lo sualtu Lal leh pasalṭha ropui tak tak kan neih thu a sawi a. Kan mi hmasa ten an phu tawk chawimawina an dawng lo erawh chu pawi a tih thu a sawi bawk. Bawrhsap hian zirlai kalkhawmte chu Mizo ram leh hnam tana mi huaisente chawimawia, chawisangtu ni turin a chah a, an chanchinte khawvel hriata phochhuaktu nih tum turin a fuih bawk a ni.

Pi Lalmuanpuii Chhangte, Field Facilitator, Social Welfare & Tribal Affairs Department chuan PM DAJGUA chungchang sawizauna hun hmangin, PM DAJGUA chu India ram zalenna sualtu, tribal hruaitu ropui ‘Father of the Earth/ Dharti Aaba’ tia koh ṭhin Birsa Munda hming chawia duan a nih thu a sawi a. Tribal ten zirna lamah te, hriselna lamah te, hmasawnna ruhrel din kawngah te, tui thianghlim leh chenna in ṭha zawk neih kawngah te hmasawnna an hmuh theih nana hmalak chu PM DAJGUA tum ber a ni tiin, Champhai District chhunga Block 2 - Champhai leh Khawbung RD Block-a thingtlang khua 30-ah te kum 5 chhung (2024-25 - 2028-29) kalpui tur a nih thu a tarlang.

PM DAJGUA hnuaiah hian Line Department 17 an awm a, a hnuaiah hian sawrkar laipui scheme 25 (PMGSY, JJM, PMAY (G) etc ) te khaikhawm a ni. He scheme hi scheme danga hnathawh zawh loh te thawh kimna tur a ruahman a ni a. Mizoramah chuan Social Welfare & Tribal Affairs Department chu Nodal Department an ni a. He scheme hnuaia hmalakna te hi uluk taka vil leh en zui tur niin, District leh Block Level-ah Committee din a ni a, PM Gati Shakti Portal-ah hnathawh zawng zawng te hi upload vek a ni dawn a ni.

PM DAJGUA IEC Campaign kharna hun hi Pu Ngulzaṭhuama, SDO (S) chuan a kaihruai a. IEC Campaign puala inelna hrang hrang buatsaihtu - Sub Headquarters YMA, DEO leh SDEO Office te hnen aṭangin report ngaihthlak a ni a. Inelna a tiṭhate hnenah lawmman sem nghal a ni.

Lawmman dawngtute chu:

Essay Writing Competition (HSS)
1. HS Lalsiammawii , DM HSS
2. C. Vanlalawmpuii, Govt GM HSS
3. HD Malsawmsanga, DM HSS

Drawing Competition (Middle School)
1. Immanuel Lalrinawma. Holy Mission School
2. Lalruatfela, Govt Vengthlang MS
3. L Zamuana, Govt Bethel MS

Quiz (Inter Branch YMA High School Level)
1. Zotlang Branch YMA
2. Vengsang Branch YMA
3. Bethel Veng Branch YMA; te an ni.