3200/2024-2025

Dated Aizawl, the 26th November, 2024: Vawiin khan Secretariat Conference Hall ah Chief Minister Pu Lalduhoma chuan Education Department hmalakna hrang hrang enpuina (Review Meeting) a neihpui.

Chief Minister chuan, review meeting tel tura district officers te kokim taka an rawn tel avangin lawmthu a sawi. A thusawi tlangpui te chu:

1. Thil dik lo zawng hrim hrima review meeting buatsaih kan ni lo va, kan dinhmun dik tak leh hnathawn dan te hriat chian kan duh ber a ni. A tul angin thil fel lo awm te kan sawiho zel ang a.

2. Project Monitoring Committee ten project thawh mek 40 vel an endik tawh a, siam that ngai an hmu thin. Kan sawrkar ve chin atang hi chuan project kan thawh te hi a nihna tur ang taka thawh leh bawhzui ni ngei se kan duh. Kan khauh dawn.

3. Department tinah service review committee din turin kan ti mek a. Sawrkar hnathawk, chhawr tlak si loh kan kawl te dan ang taka chhuahtir mai tha kan ti. Sawrkar hnathawk quality tha neih kan tum tlat a ni.

4. CSR hi tunhma chuan a sawi chhuak thiam thiamin an sawi chhuak a, an duh dan danin an hmang zui leh mai niin a ngaih theih. CSR hi awmze nei zawkin ram tan tangkai takin a hman theih a. Chuvang chuan CSR hi CM Office atangin kan centralise a, department tinten CSR in dap zel ang a, CSR Cell hriatpuina zelin in kal dawn nia.

5. Central Fund kan dapna kawngah state share percent sang chi hi chu pumpelh hram hram kan duh. Chuvang chuan department ten central-a thehluh tur project kan neih reng reng Planning Department kaltlang zela thehluh tur a ni. Chu chuan project inthuah awm thei a veng bawk ang.

6. Review Meeting hi CM Office atangin minute ziah thin a ni a, kan minute te kan bawhzui tha em tih kha rang taka lo hriat leh kan duh thin. Hmasawnna hna hi thawh vat vat kan duh. Sawrkar hnathawkten office hour piah thlenga hnathawh pawh hreh lo vang u. Central Secretariat ka zu tlawh fo va, an peon file keng te thlengin an kal hne hne ngai lo. Zan dar 8 thlenga office a awm hi kalphung nghet ang maiin an nei a, over time allowance an phut pawh kan hre hran lo. Kan ram tan kan thawk a, inpe ang u.

Meeting hi Dr. Vanlalthlana, Minister, Education chuan a kaihruai a, Chief Minister-in department te hmalakna enpui a meeting a buatsaih hi tunhma lama la awm ngai lo thil thar a ni a. A lo neihpui tawhten an hlawkpuizia te pawh min hrilh. Vawiinah Education Department min han neihpui hi kan phur a, officials te kan kal tha a, district officers te thlengin an rawn kal tha hle a ni, a ti.

Education Department hmalakna te hi a tam tham avangin Minister Dr. Vanlalthlana hian khaikhawmin presentation a pe hmasa a. Chumi hnuah sawiho tur chhawp chhuah te leh zawhna awm te sawihona an nei zui a ni.

Chief Minister hi Pu TBC Lalvenchhunga, Adviser to CM, Prof. Lalbiakdiki Hnamte, Working Chairman, Education Reforms Committee, Pu Vanlaldina Fanai, Commissioner & Secretary to CM bakah Planning & Programme Implementation officials pawimawhten an tawiawm.