2592/2026-2027

Champhai dated the 8th October, 2026 : Vawiin khan Mizoram Legislative Assembly hnuaia Subject Committee-I chuan an Chairman Pu Lalmuanpuia Punte, Adviser to CM (Political) hovin Fisheries Department hnuaia Pradhan Mantri Matsya Sampada Yojana (PMMSY) hmanga Champhai leh a chhehvela sangha khawina leh hmalakna hrang hrangte a hmunah kalin an enfiah.

He Spot Visit-ah hian Subject Committee-I member Dr. Lorrain Lalpekliana Chinzah, Pu Rasik Mohan Chakma, Pu K. Laldawngliana, Pu K. Hrahmo leh Pu Jeje Lalpekhlua te an tel a. Department hotute aṭangin Er. Lalrothanga, Secretary, Fisheries Department, Pi Zonuntluangi, Director, Pu K. Lalrinmawia, ADF leh DFDO Champhai ten an tawiawm a ni.

Committee hian Champhaia sangha chi tharchhuahna (hatchery) leh Biofloc hmuna hmalaknate tlawhin, Pu F. Laldingliana (Champhai Kahrawt - Hatchery), Pu Khuanghlira (Champhai Zote – Hatchery) leh Pu J. Lalbiakthanga (Zotlang - Biofloc) te hmunhma an enfiah a ni.

Subject Committee chuan sawrkarin PMMSY leh scheme hrang hrang hmangin sangha khawitute a ṭanpui a, hmasawnna an neih zel theihna turin thawhpui a inpeih reng thu sawiin Mizoram hi sangha tharchhuahna kawnga a intodelh theihna turin sangha khawitute pawhin scheme hnuaia ṭanpuina an hmuhte dik taka hmang chhunzawm tur leh, Hatchery leh Biofloc tihnun loh a awm te pawh tinung thar leh turin a chah a ni.

Sangha khawitute pawhin PMMSY hnuaia Hatchery leh dil siamna aṭanga hmasawnna an neih dante leh sangha note chaw leh a dahna tur nursery chungchangah harsatna an neihte an thlen a. Committee chuan sangha khawitute harsatna leh mamawhte hi a tahtawla chin fel dan turte an sawipui a ni.