2591/2026-2027

Dated Khawzawl, the 8^th October, 2026 : Vawiin khan Khawzawl District Election Officer Pu K. Vanlalthiana hovin a pisa-ah Special Intensive Revision Special Drive chungchangah press briefing neih a ni.

Election Commission of India thupek angin Special Enrolment Drive vawiin October ni 8, 2026 atangin October thla chhung kalpui leh tur a ni a. He enrolment drive ah hian heng mite hi ngaih pawimawh lehzual an ni dawn a ni.

1. India khua leh tui dik tak ni si, Special Intensive Revision 2026 kalpui lai a hmaih palh emaw, awm remchan loh avanga electoral roll atanga paih emaw chhan dang engemaw vanga paihte.
2. India khua leh tui dik tak, kum 18 tling thar te.

He enrolment drive hi hetiang hian kalpui tura ruahman a ni.

(a) BLO tin ten an booth chan chhunga electoral roll chu SIR kalpui a nih hma leh SIR Final Roll uluk takin an lo zirchiang anga, SIR kalpui a nih hma a electoral roll a chuang si, SIR Final Roll a chuang ta lo te list an lo siam theuh dawn a ni. SIR kalpui a nih hma khan 22-Tuichangah(ST) AC electoral roll-ah hian voter 17981 an awm a, SIR final rollah khan voter 17527 an awm thung a ni.

(b) Chumi list hmang chuan BLO ten in tinah kalin, House to House visit an nei anga, an list siam chhuah tak a mi te kha electoral roll a paih ngai ngei an ni em tih an enfiah ang a, India khua leh tui dik tak, Electoral Roll a chuang thei ngei tur an ni tih hmuhchhuah a nih chuan Form-6 hmangin dilna an thehluh tir nghal zel ang. BLO ten list an siam ah pawh Form-6 an pek chhuah leh te chu an chhinchhiah zel ang.

(c) BLO te hian India khua leh tui dik tak, kum tling thar emaw, SIR 2026 kalpui lai a dilna thehlut ve hmanlo emaw hmaih palh emaw te an awm chuan Electoral Roll a an luh theihnan Form-6 hmangin dilna an thehluh tir ve ang. Chung mi te chu list hran BLO ten an siam ve leh bawk ang.

(d) BLO hian a list neih te hi Booth Level Agents hnenah a copy a pe ve ang a, heihi BLA te pawh hian uluk takin an lo thli thlai ve beisei a ni.

(e) BLO hian field verification report hi ERO/AERO hnenah report a pe chhawng ve leh ang a, Form-6 hmanga dilna a dawn te pawh a thehlut ang.

(f) Form-6 hmanga dilna lut te hi ERO leh AERO ten uluk takin an lo enfiah ang a, Representation of the People Act, 1950 leh Registration of Electors Rules, 1960 hnuaiah India khua leh tui dik tak te chu Electoral Roll a an chuan theihna turin hma an la chhunzawm ang. ERO in thutlukna a siam chu Political Party te hrilh hriain a diklo awm nia hriatte chu a ngaihtuah nawn leh thei ang.

(g) Special Enrolment Drive neih chhung hian pem emaw correction emaw mitthi paih emaw a kalpui theih reng bawk a ni. 

(h) He Special Enrolment Drive neih tur hian India khua leh tui dik tak ni lo te chu a huam ve lo ang.