No.4399/2020-2021

Dated Champhai, the 25th August, 2020: Vawiin chawhma dar 11:00 khan I&PR Auditorium CHANEM Building-ah District Child Protection Unit (DCPU) Champhai leh Women and Child Development, Govt. of Mizoram buatsaihin Champhai district chhunga Child Protection Service Provider-te tan hursualna laka naupangte venhimna dan ‘Protection of Children from Sexual Offences Act, 2012 (POCSO Act, 2012) leh Protection of Children from Sexual Offences Rules, 2020 (POCSO Rules, 2020) chungchang inzirtirna hun buatsaih a ni.

He hun hi District Child Protection Unit Chairman Pi Maria C.T Zuali, Champhai Bawrhsap ni bawk chuan khuallian niin a hmanpui a. Bawrhsap chuan naupangte pawimawhna leh naupangte venhim kawnga hnam anga tanho pawimawhzia sawiin, rilru lama piansualna nei ten mi chunga harsatna an thlen thui thin zia leh a bikin hursualna rawngkaia naupangin khuaikhem an tawk thin chu hnam ang pawha thil pawi tak anih thu a sawi a. Naupangte'n hleilenna an tuar palh thulhah a tuartute'n huaisen taka an puan chhuah theihna tur leh hursualna laka an him theihna turin chhungkuaah uluk taka zirtirna kalpui angai hle a ni, a ti. Home hrang hranga naupang enkawltute chu an hna phur taka thawk tura fuihin naupang harsatna tawkte'n belhtlaka an ngai chu chhuang hle tura chahin, naupang humsual daite enkawl bakah humsual dai turte ven him chu an mawhphurhna a ni tih hriaa hleilenna tuartute'n huaisen taka an puan chuah theihna tura midangte zirtir uar turin a chah bawk.

Pi Maria C.T Zuali chuan naupang kan enkawl dan hian ram kalphung a siam thain a siam tha lo thei a ni tih tarlangin, naupangte chu khawvel la luahtu tur leh ram leh khawtlang la hruaitu turte an nih avangin ngaihthah thiang an ni lo a, khawvel ram ropuite an dinchhuah theihna chhan chu hnamah an chiang a, ram an hmangaih avangin naupang an nih lai atangin taimakna leh rinawmna an inzirtir thin vang a ni, a ti bawk. Naupang thil zir rual lekte chu thu tha tak hrilhin an nun kal zelah nghawng a neih thin avangin thawkrim leh rinawm tura kan zirtir a ngai a, kan fate hi kan rohlu ber a ni tih hi kan chian leh zual a ngai a, thawhrimna leh taimakna lam kawng hei ai hian kan inzirtir uar lehzual a tul a ni, a ti bawk.

He hun hi Pi R. Lalrinchhani, DCPO Champhai chuan a kaihruai a. Pu Lalchhuansanga Sailo, Assistant Public Prosecutor, District Court Champhai hnen atangin ‘Hursualna laka naupangte venhimna dan (POCSO Act, 2012 leh POCSO Rules, 2020)’ chungchang ngaihthlak a ni a. Champhai district chhunga hmalak dan turte leh tun aia naupangte an lo him zawk theihna tura tan lakna tur kawng hrang hrangte zirho a ni bawk.

He hunah hian Child Care Institution a thawktute, Child Welfare Committee Member-te, Juvenile Justice Board Member-te leh Special Juvenile Police Unit, Champhai aiawhte an tel a ni.

Attachment

  • Loading attachment...