No.4400/2020-2021

Dated Champhai, the 25th August, 2020: Naktip August Ni 27,2020 a Village Councils Election 2020 neih tur atan Champhai district huamchhunga inpuahchahnate chu a hmawr bawk tan a ni a, vawiin khan District Election Office, Champhai hmalaknain inthlan huna duty tur Returning Officer (RO) leh Presiding Officer (PRO), Champhai khawpui pawn khuaa duty turte pualin training hnuhnung Govt. GM High School, Vengsang-ah buatsaih a ni a, he hunah hian Returning Officer 30 leh Presiding Officer 33 te an tel a ni.

Kalkhawmte hmaah thusawiin Pu Lalnunfela Chawngthu, Asst. District Election Officer chuan naktip maia inthlanna neih tur anih tawh avangin inthlan huna mamawh tur hmanruate leh tul dangte peihfela semchhuah tan anih tawh thu a sawi a. Training tawp ber hun rawn hmangtute chu duhsakna hlanin uluk taka ngaithlaa zawhna leh hriat chian duh an neihte inthlahrung hauh lova zawtfiah zel thin turin a chah a. Polling Official-te chu tihtur bituk angte tha taka hlen tum tur leh inthlanna felfai leh muanawm tak neih anih theihna tura theihtawp chhuah turin a chah a. Polling Station tinah Voter neih dan a inzat loh avangin Polling party duty tur tam zawng a in ang lo a, inthlanna felfai tak neih anih theihna turin thawhhona tha tak neih a tul dawn thu sawiin, zing dar 7, chhun dar 12 leh tlai dar 5 ahte vote tlak dan kimchang report pek angaih dawn thu a sawi a. Kum dang ang lo takin tunlai hrileng mek Covid-19 vangin vote thlakna hmunah sawrkar siam inkaihhruainate zawm thlap tum anih thu pawh sawiin, vote thlak tura kalte hming leh biakpawh theihna phone number-te lehkhabuaah a indawt dana ziahluh zel tum a ni a, kut tihthianghlimna hand sanitizer pawh chhawp vek tum a ni, a ti. Vote thlak turte chu hmaituamna vuah vek tur leh inhnaih lo thei ang bera awm tura chahin, hemi kawngah hian vote thlakna hmunahte a tul anga hmalak tum anih thu a sawi bawk.

Vawiin training-ah hian Master Trainer pahnih te’n zirtirna an pe a. Pi Esther Leihang, DLAO/SDC hnen atangin inthlanna buaipui kawnga RO leh PRO te mawhphurhna leh tihtur hrang hrangte, Electoral Offences leh form pawimawh hrang hrang chungchang leh tul dangte ngaihthlak a ni a. Pi R.Lalnunkimi, DTO/BDO Champhai hnen atangin vote tla chhiar dan tur leh vote tla chhiar huna hriattur tulte ngaihthlak a ni bawk. Naktuk hian Champhai khawpui chhung leh a chhehvela RO leh PRO te pualin training buatsaih a ni ang.

Champhai District Village Councils Final Electoral Roll, 2020- tlangzarh takin a tarlan danin Champhai district chhungah VC 62- a awm a, Voters 50,452 an awm dawn bawk a ni. Champhai district chhungah hian Village Councils seat 282 a awm a, heng zinga 208 hi General seat niin, 74 dangte chu hmeichhiate tana hauh reserved seat a ni a, Village Councils seat 3 nei hi 26 awmin, seat 5 nei 24 leh seat 7 nei 12 an awm a ni. Polling Station 62 ah Polling Booth 71 leh Voting Compartment 104 siam tum niin, Polling Station 9 (Bethel, Farkawn, Hnahlan, Kahrawt, Kanan, Venglai, Vengsang, Vengthlang, Zotlang ‘E’) ah te Polling Booth 2 theuh siam tum ani a, a bak zawngah Polling Booth 1 theuh a awm ang. Inthlannna buaipui tur hian Returning Officer 62, Presiding Officer 71 leh Polling Officer 128 te ruat niin, Counting table 191 siam tum a ni bawk.

Village Councils inthlanna tura Electoral Roll thar ber tlangzarh takin a tarlan dan chuan Champhai district chhungah vote nei mi 50,452 an awm a, heng zinga 24,621 hi mipa niin 25,831 te hmeichhia an ni a, hmeichhia vote nei hi mipa aiin 1,210 in an tam a ni. VC malah Vengthlang VC huamchhungah vote nei tam berin mi 2,436 an awm a, New Hruaikawn VC huamchhungah vote nei mi 113 awmin a tlem ber a ni.