4420/2023-2024

Champhai, the 3rd April, 2024: Tun thla April ni 19, 2024 a neih tur General Election to Lok Sabha, 2024 a duty tur Polling Officer-II leh Polling Officer-III te tan vawiin khan Govt. GM Higher Secondary School, Champhai Vengsangah training thawhkhatna buatsaih a ni.

He hun hmanpuitu District Election Officer Pu James Lalrinchhana chuan District aiawha election buaipuia Polling Station tina duty tur Polling Officer-te chu tha taka mawhphurhna hlen tura beisei an nih thu leh hemi tura mi puitling tak tak thlan chhuahte an nih thu sawiin, inthlanna muanawm leh felfai neih a nih theih nana mi pawimawh tak takte an nih thu a sawi a. Ruihhlo, nungchang mawi lo leh election khawih pawlh a rem dawn loh thu sawiin, dan kalha chete chungah a tul anga hmalak zel a ni ang, a ti a. Training zinga a tam zawkte chu election lo hmachhawn tawh ni mahse, training palzam mai lova thil thar awmte hriat belh nana chhawr tangkai tum turin a fuih a. Hriat duh leh fiah tawk lote inthlahrung lova zawt nghal zel turin a chah bawk.

Pu James Lalrinchhana chuan election kaihhnawih buaipuitute chu ECI hnuaia awm an nih thu sawiin, Polling Officer-te chu Master Trainer tha tak takte zirtirna ngaipawimawha district tihmingthatu nih tum turin a sawm a. Taksa leh rilru hriselna dah pawimawh fo tura fuihin, mahni inrintawkna nen nuam ti taka inthlan an hmachhawn theih nan training buatsaihte chhawr tangkai vek tum turin a fuih a. Training thawhhnihna April ni 8 leh ni 9 ah buatsaih tum a nih thu leh training thawhthumna April ni 17 ah neih tuma ruahmanna siam a nih thu a tarlang bawk.

Thusawitu dang Deputy District Election Officer Pu K. Zorammuana chuan election chu thawhhona leh inlungrualna nena hmachhawn ngai a nih thu sawiin, kalkhawmte chu inpuihtawnna ngaipawimawh tur leh training bakah material neih angte ngaihven turin a fuih a. Mahni chanpual theuh hneh taka hlen thei tura inbuatsaihna tha tak kalpui theuh turin a chah bawk a. Training kaltlanga zirtirnate ngaihpawimawh tawk loh avang leh hmanraw pekte zirchian loh avangtea chetsualna a lo thlen tawh dante tarlangin, vote thlak ni a duty turte chu a bultanna mock poll atanga a tawp kharna thenga felfai taka buatsaih tum turin a chah nghal bawk.

He hunah hian Pi Lalhruaitluangi, SO/SLMT, Pu N. Lalzarzova, BDO Khawbung/ DLMT, Pu Moses Lalfakawma Tlau, SDC/ALMT leh Dr Vanlalnunpuii Ralte, SDC/ALMT te'n Polling party-te mawhphurna hrang hrang leh Postal Ballot chungchangte an zir tir bakah EVM chungchang an zir tir a ni.

Champhai District huamchhunga Assembly Segment pathum, 23-Champhai North AC, 24-Champhai South AC leh 25-East Tuipui AC ahte Polling Station 84 a awm a. Hemi atan hian Polling Official mi 440 (Presiding Officer, Polling Officer I, Polling Officer II leh Polling Officer III atan Official 110 theuh) te ruat niin, first randomization neih zawh tawh a ni a. Nimin khan Presiding Officer leh Asst. Presiding Officer/Polling Officer-I te tan training thawhkhatna buatsaih a ni bawk.

General Election to Lok Sabha, 2024 atan hian Champhai District Assembly Segment 3 te chu Zone 13 ah then niin, Zone tinahte hian Sector Officer leh Sector Police Officer-te ngawrh takin an duty mek a. Election Expenditure Monitoring hnuaia team hrang hrang; Assistant Expenditure Observers, Flying Squad (FS), Static Surveillance Team (SST), Video Surveillance Team.(VST), Video Viewing Team (VVT), Accounting Team (AT), Media Certification & Monitoring Committee (MCMC), District Expenditure Monitoring Committee (DEMC) te bakah Enforcement Agency hrang hrangte'n inthlan senso leh MCC kenkawh chungchang an vil mek a ni.

February ni 8, 2024-a Final Electoral Roll tlangzarhin a tarlan dan chuan Champhai District-ah voter 57,454 an awm a. Heng zinga 28,018 hi mipa niin 29,436 hi hmeichhia an ni.