35/2024-2025 

Champhai, the 3rd April, 2023: Vawiin chhun dar 12:00 khan Pu James Lalrinchhana, District Election Officer, Champhai District chuan Tlangsam tlawhin, General Election to Lok Sabha, 2024 atana hman tur Govt. Tlangsam Middle School-a Tlangsam-I leh Tlangsam-II Polling Station-te tlawhin a enfiah.

District Election Officer Pu James Lalrinchhana chuan Election Commission of India duhdan leh election danin a phut angin vote thlaktu leh Polling party duty te'n harsatna an tawh loh nan leh felfai taka vote thlak a nih theih nan Polling Station tinah hmanraw mamawh awm ngei tura bituk chin, Assured Minimum Facilities (AMF) te a awm vek theih nana hmalak thin a nih thu a sawi a. Tunhnaia thli leh ruah na taka thawkin Tlangsam -II Polling Station-ah chhiatna a thlen chu pawi a tih thu sawiin, thuneitu sang zawk hnenah pawh thlen nghal a nih thu a sawi a; a tul angte chak taka buaipui a ni leh mamawhna a san tawh avanga hun reilote chhunga peihfel a ni mai tur chu lawmawm a tih thu a sawi a. Tun aia changtlung zawka Tlangsam-I leh Tlangsam-II Polling Station-te siam a nih theih nan hmalak a nih tur thu a sawi bawk.

He hunah hian DEO ho hian tunhnaia thli leh ruah na taka thawkin Tlangsam-II Polling Station atana hman Govt. Tlangsam Middle School bang a tih chim leh a chung thliin a lakte enfiah niin, School Education kaltlanga school luh hma ngeia zawhfel hman tuma thawmthat hna kalpui mekte pawh enfiah a ni bawk a. Tun atana hmalaknate chu tha rih ni a hriat a ni a, nakin hun thlirin changtlung zawka chei dan turte pawh enfiaha sawiho a ni a. Heng bakah hian he school hmun tho a awm Tlangsam-I Polling Station pawh enfiah niin, lei che avanga a chhuat khi leh tla hniamte chu a rang lama hnawhphuia siamrem ngai ni a hriat a ni a; hmalak nghal thuai dan turte ruahman a ni bawk.

Heng bakah hian Polling Station atana tul hrang hrang leh awm ngei tura bituk Assured Minimum Facilities (AMF) hnuaia ngaipawimawh heng Polling Station kalpawhna kawng, tui intur, power supply, inbiakpawhna signal, wheelchair luhna ramp, toilet, vote thlaktute intlarna leh luh chhuahna, bungraw mamawh bakah Polling Station hmunhmate enfiah a ni.

District Election Officer Pu James Lalrinchhana hi Dy. DEO Pu K. Zorammuana, DIPRO Dr. Lallawmkima, SDEO Pu Lalthlamuana Tochhawng, JE DRDO, BLO leh School Headmaster te'n an tawiawm a ni.