36/2024-2025 

Aizawl, 03.04.2024: Lok Sabha Inthlanpui 2024 lo awm tur atana SVEEP (Systematic Voters Education & Electoral participation), Aizawl District in election chungchang inhrilhhriatna leh zirtirna kawnga hma a lakna peng khat atan Millennium Centre Atrium-ah Art Workshop & Exhibition a buatsaih a. Vawiin chawhma khan Aizawl District Election Officer, Pi Nazuk Kumar, DC Aizawl chuan khuallian niin a hawng. He Art workshop & exhibition hi ni thum (April ni 3 – 5, 2024) chhunga neih tur niin, Aizawl Art Gallery & School of Fine Arts nen thawk hova buatsaih a ni.

DEO Pi Nazuk Kumar chuan vote thlak pawimawhna sawiin, MLA inthlan ah Mizorama vote a tlak that viau thin thu leh a dawt chiah MP inthlan ah vote tla a kiam tak thin thu a sawi a. A inkar a hlat loh avangin MP inthlan hi kan ngaihpawimawh thar a tul thu sawiin DEO chuan seat pakhat chauh nei mah ila chu seat pakhat luahtu chuan state tan hmasawnna tur tam tak a thlen theih thu a sawi a. Artist te nen thawk hova, vote pawimawhna an puangchhuak ho thei tur chu lawmawm a tih thu sawi bawkin Aizawl DEO chuan April ni 19, 2024 ah vote nei tawh phawt chuan vote thlak ngei turin mipui a chah a ni.

SVEEP Nodal officer Pi C. Laltleipuii pawhin inthlanpui pawimawhna a sawi a. Art Workshop & Exhibition buatsaih chuan rah tha a chhuah ngei a beisei thu a sawi bawk.

He hunah hian Aizawl Art Gallery & School of Fine Arts Pu Laltanpuia chuan Art chu thu pawimawh inhrilhriatna hmanraw tangkai (medium of information) a nih thu sawiin, inthlanpui pawimawh tak ram in a hmachhawn tur inpuahchah naah DEO Aizawl leh a thawhpuite’n artist te an thawhpui chu lawmthu a sawi a ni. He hun hi Emily Lalrinpuii, SVEEP Core Committee member in a kaihhruai a ni.