91/2024-2025 

Champhai, the 8th, 2024: Tun thla April ni 19, 2024 a neih tur General Election to Lok Sabha, 2024 a duty tur Polling Personnel-te tan vawiin khan Govt. GM Higher Secondary School, Champhai Vengsangah training thawhhnihna buatsaih a ni.

He hun hmanpuitu District Election Officer (DEO) Pu James Lalrinchhana chuan polling personnel-te chu team hrang hranga siam fel an nih tawh avangin thawhpuite nen inhmelhriata thawhhona tha neih tum theuh turin a fuih a. Inthlan lo hmachhawn fo tawh pawh nise, thiam tawh anga inngai mai lova a hma ai zawnga thiam bel tum turin a chah a. District chhunga inthlanna buaipui tura mi rintlak tak tak thlanchhuahte an nih thu sawiin, mawhphurhna an neihte tha taka hlen turin intuaihriamna training dah pawimawh turin a chah a. EVM/VVPAT khawlte chu nela mitthla thiam tur leh chiai lova bel taka khawih thiam tum turin a fuih a. Mahni inrintawkna nei tura pawimawh tak trainning buatsaih chu ngaipawimawh turin a chah nawn leh a. Training material, handbook leh form pawimawhte chiang taka hre bel tur leh inlama enzui thin turin a fuih a; zawh duh leh hriat duh an neihte Master Trainer-te zawhfiah reng theih an ni, a ti a. Polling personnel-te chu hotute thu zawm thiama tawiawm tlat turin a chah bawk a. Vote thlak huna duty turte chu Mock Poll atanga bultan that tum turin a chah nghal bawk.

Thusawitu dang Deputy District Election Officer (Dy. DEO)/Addl. DC Pu K. Zorammuana chuan polling personnel-te chu team anga thawkho tur an nih avangin inhrechianga innel tur leh hriselna chena inhriatpawh tum turin a fuih a. EVM/VVPAT leh form pawimawhte chu mobile phone khawih tluk zeta thiam bel tum tura chahin, training duh tan DC Office-ah engtik lai pawhin EVM/VVPAT khawih theiha chhawpchhuah reng a ni, a ti bawk.

Champhai District huamchhunga Assembly Segment pathum, 23-Champhai North AC, 24-Champhai South AC leh 25-East Tuipui AC hnuaia Polling Station 84 atan Polling Personnel mi 440 (Presiding Officer, Polling Officer I, Polling Officer II leh Polling Officer III atan Official 110 theuh) te ruat niin, second randomization neih zawh tawh a ni a. Polling personnel-te hian an duty-na tur Assembly Segment an hriat tawh bakah an duty pui turte nen team siam rem a ni tawh a. Vawiin training-ah pawh hian team ang zela thut tlan tir niin, training an nei tlang a ni. Polling personnel-te'n an duty-na tur Polling Station an hriat theihna tur Third Randomization of Polling Personnel chu vote thlak ni thlen hmain khawl hmanga siam rem a ni ang.

Polling personnel training thawhhnihna hi ni hnih chhung awh tur niin vawiin training-ah hian Polling party Team 56 an tel a; heng zingah hian hmeichhe hlang duty-na tur Pink Polling Station-a inthlan buaipui tur polling party team 8 an tel a. Naktuk hian Team dang zawngte'n training thawhhnihna an nei ve leh dawn a, ruahman dan chuan training thawhthumna leh a hnuhnung ber tur chu April ni 17, 2024 hian buatsaih a ni ang.

He hunah hian Pi Lalhruaitluangi, SO/SLMT, Pu N. Lalzarzova, BDO Khawbung/ DLMT, Pu Moses Lalfakawma Tlau, SDC/ALMT leh Dr Vanlalnunpuii Ralte, SDC/ALMT te'n Polling party-te mawhphurna hrang hrang, form pawimawhte leh EVM/VVPAT khawl hman dante an zirtir bakah a taka entir a ni a. Pu K. Lalngaihzuala, DLMT (Poll Star)/DIO, NIC leh Pu Zairimawia (Poll Star)/NE, NIC te'n Poll Star hman dante an zirtir bakah a taka entir a ni bawk.

Polling personnel training-te hian QR Code scan-in attendance an dah a. Election Duty Certificate (EDC) pek chhuak nghal zel an ni bawk.

General Election to Lok Sabha, 2024 atan hian Champhai District Assembly Segment 3 te chu Zone 13 ah then niin, Zone tinahte hian Sector Officer leh Sector Police Officer-te ngawrh takin an duty mek a. Election Expenditure Monitoring hnuaia team hrang hrang; Assistant Expenditure Observers, Flying Squad (FS), Static Surveillance Team (SST), Video Surveillance Team.(VST), Video Viewing Team (VVT), Accounting Team (AT), Media Certification & Monitoring Committee (MCMC), District Expenditure Monitoring Committee (DEMC) te bakah Enforcement Agency hrang hrangte'n inthlan senso leh MCC kenkawh chungchang an vil mek a ni.

February ni 8, 2024-a Final Electoral Roll tlangzarhin a tarlan dan chuan Champhai District-ah voter 57,454 an awm a. Heng zinga 28,018 hi mipa niin 29,436 hi hmeichhia an ni.