254/2024-2025 

Champhai, the 17th April, 2024: Lok Sabha Inthlanpui, 2024 atana Champhai District Assembly Segment 3 hnuaia Polling Station 84 a inthlan buaipui tura ruat Polling Personnel-te tan training thawh thumna leh a hmawrbawkna ni bawk chu vawiin khan Govt. GM Higher Secondary School-ah neih a ni.

Champhai District chhunga inthlan buaipuia vote thlak ni a Polling station-a duty tur Polling personnel-te training hnuhnung ber hmanpuitu District Election Officer Pu James Lalrinchhana chuan polling personnel-te chu inthlanna hmanrua an lak atanga an dahfel leh thlengin buaina an tawh loh nan fimkhur taka hma la turin a chah a. Mock poll atanga vote thlak zawhfel hnu thlenga tihtur indawt dan hrang hrangte tawifel taka sawifiahin, polling party-te chu mock poll hmanga tha taka bultan tum turin a fuih a. Harsatna an tawhin chiai mai lo tura fuihin, anmahni pui turin ruahmanna tha tak siam a nih thu a sawi bawk.

Pu James Lalrinchhana chuan danin a phal angin chhuah dawnah chauh an kalna tur Polling Station hriattir an nih dawn thu sawiin, Receiving Centre leh Polling Station inkarah khawiah mah pen kawi a rem loh thu a sawi a. Polling personnel-te chu training-a an thil zirchhuahte a taka hman tum tura fuihin, inrintawkna nen rinawm taka mawhphurhnate hlenchhuah tum turin a fuih a; tihsual a awm loh nan inbiakpawhna leh tawngtaina nen kan invilin kan inveng tawn zel dawn a ni, a ti a. EVM/VVPAT khawl a buai palh thulha buaipui tur Engineer-te hmun 4 ah chhawp an nih dawn thu leh Sector Officer-te an duty kual reng dawn thu sawiin,  huaisen tak leh thlamuang taka an duty theuhte thawk theuh turin duhsakna a hlan a ni.

Dy. DEO Pu K. Zorammuana chuan training tawp ber ni chu hriat duh leh zawhna an neihte kimchang taka zirna hun atana hmang turin a chah a. An chanchinte ngun taka ngaihven reng a nih dawn thu sawiin, Control Room atangin  hmalaknate ngun taka vil reng a nih tur thu a sawi bawk.

He hunah hian Election Officer Pu Benjamin Zalawma Ralte in Polling party chhuak tur leh dawnsawn kawnga ruahmanna siamte a sawifiah a. Polling party-te chetvelna bakah inthlan zawhfel hnua bawhzui ngai dangte chungchanga ruahmanna siamte a sawifiah bawk.

He hunah hian Pi Lalhruaitluangi, SO/SLMT, Pu N. Lalzarzova, BDO Khawbung/ DLMT, Pu Moses Lalfakawma Tlau, SDC/ALMT, Dr. Vanlalnunpuii Ralte, SDC/ALMT, Pu K. Lalngaihzuala, DLMT (Poll Star)/DIO, NIC leh Pu Zairimawia (Poll Star)/NE, NIC te'n zirtirna an pe a ni.