4636/2023-2024

Champhai, the 17th April, 2024: Vawiin chawhnu dar 2:30 khan DC Complex, Keifangtlang playground-ah General Election to Lok Sabha, 2024 inthlan huna polling party-te lirthei hman tur khalhtute kohkhawm an ni a. Hriattur pawimawh hrang hrang, tihtur leh tihloh turte hrilhhriat an ni.

He hun hmanpuitu District Election Officer Pu James Lalrinchhana chuan thawhhona thuthlung siam leh beiseinate a taka tihhlawhtlin a ni chu lawmawm a tih thu a sawi a. Driver kalkhawmte chu Sawrkarin duty official-a a puante an nih tawh avangin rilru fim leh nungchang mawi tak pu turin a chah a. Inthlan duty hun chhungin election danin a phuar tlat avangin inkaihhruainate tha taka zawm turin a chah a. Vote thlak theuh tur leh midangte vote thlak tura zirtirtu nih tum turin a sawm a. Midangte innghahna tak tak an nih thu leh hna zahawm tak thawk an nih thu tarlangin, chhawr an nih chhan leh inremna thuthlung siamte ngaipawimawh tura fuihin mawhphurhna an neihte tha taka hlenchhuah tum turin a chah nghal bawk.

He hun hi Election Officer Pu Benjamin Zalawma Ralte in kaihruaiin ruahmanna siamte a sawifiah a. Dy. DEO Pu K. Zorammuana leh Champhai Aizawl Maxicab Service Owners (CAMS) Chairman Pu Lalmuanpuia te hnen atangin fuihna thu ngaihthlak a ni a. Poster bel fel niin Election Duty Certificate (EDC) dilte hnenah sem chhuah nghal a ni bawk.