No.5325/2020-2021

Dated Champhai, the 22nd September, 2020: Sawrkar laipui Ministry of Tribal Affairs hnuaia Tribal Co-operative Marketing Federation of India (TRIFED) bultumin vawiin khan ARCS Champhai leh Champhai Town Multipurpose Cooperative Society Ltd. te tangkawp chuan Pradhan Mantri Vandhan Yojona (PMVDY) chungchang leh Wood Vinegar siam dan Society leh Self Help Group Member-te zirtirna CTM-School, Champhaiah an buatsaih. Ni 3 awh tur training hi Pu C.Lalbethlehema, Asst. Registrar Cooperative Societies Champhai chuan khuallian niin a hawng a ni.

He hun Pu J.Dengruma, Vice Chairman, Champhai Town Multipurpose Cooperative Society Ltd. kaihhruaiah hian Pu C.Lalbethlehema chuan hun rei tak atanga an lo thlir tawh Mizorama a hmasa ber tura Pradhan Mantri Vandhan Yojona (PMVDY) hnuaia Wood Vinegar siam tura Champhai Town Multipurpose Cooperative Society Ltd. thlan an ni chu lawmawm a tih thu sawiin hlawhtling taka kalpui a beisei thu a sawi a. Hmasawn turin thawhhona tha a pawimawh thu sawiin training chhimtute chu lungrual taka thawkho tura chahin, traning chu hlawk taka hmanga hlawhtlinpui ngei tura duhsakna hlanin training hi a hawng a ni.

Training-ah hian zirlai naupang leh Champhaia SHG te kohkhawm niin, Pu C. Vanlalhruaia Sr. Inspector Cooperative Societies Champhai hnen atangin Pradhah Mantri Vandhan Yojona (PMVDY) chungchang ngaihthlak a ni a. PMVDY hi India rama Tribal mite hmasawnna tur atana Scheme pawimawh tak pakhat Ministry of Tribal Affairs bul tuma Tribal Co-operative Marketing Federation of India (TRIFED) chu a kutke pakhat niin State sawrkar nen tangrualin he scheme hi kalpui a ni, a ti a. Van Dhan Mission in a tum ber chu Tribal-te'n an chhehvela ramngaw hausakna hmang tangkaia intunnunna atana an hman theihna tura ruahmanna siam niin awmze nei zawk leh an chhehvel ramhnuaia thil thar chhuahte an mahni ngeiin an sawngbawla, a hralhna thlenga an kutken theihna tur scheme anih thu a sawi bawk.

PMVDY hnuaiah hian SHG pakhat zelah Rs 1,00,000 zel ruahman niin training atan za zela 30 leh hmanraw tenau leina atan za zela 67 ruahman ni bawkin SHG 15 ten Kendra khat siamin Kendra-te hnathawhna tur hmun he Van Dhan Mission-ah hian ruahman lawk tur niin Beneficiary-in remchang emaw VC in emaw an remchan anga ngaihtuah tur a ni bawk. He Mission-in a tum ber chu ramngaw hausakna leh thlai chi hrang hrangte lakkhawma awmze neia sawngbawla, man man zawka hralh chhuah leh a hlawkna a lakhawmtute ngeiin tumah inrawlh buai lova an tel hi a ni. PMVDY hian Tribal-te hmalakna lo tanpui leh kaihhruai hi a tum ber a ni.

He hunah hian Pu HS Vanlalfakzuala hnen atangin Wood Vinegar siam dan leh a tangkaina hrang hrangte ngaihthlak a ni a, Pi Lalzarzovi, Agriculture Extension Officer hnen atangin huan leh lo neih kawnga Wood Vinegar hman dan ngaihthlak  a ni bawk.