No.5326/2020-2021

Dated Khawzawl, the 22nd September, 2020: Vawiin chawhnu dar 2:00 khan Khawzawl Bawrhsap Pu Zothanmawia chuan Khawzawl District Hospital-a Covid-19 hri vei leh vei lo enna tur khawl thar TrueNat Laboratory bunfel a hawng.

Khawzawl District Hospital Meeting hall-a TrueNat Laboratory hawnna inkhawm Dr Frank Harris, District Medical Superintendant kaihhruaiah hian District Bawrhsap Pu Zothanmawia chuan hmun leh hmuna Covid-19 hri vei leh vei lo en theih a ni ta chu lawmawm a tih thu sawiin, min ti zangkhai phah dawn hle a ni, a ti a. Khawzawl district tana Covid-19 hri kai leh kai lo enna khawl hman a nih theihna tura rim taka thawktu Khawzawl District Hospital-a thawktute fakin, khawl hman theiha peihfel a ni ta chu lawmawm a tih thu a sawi a. District Bawrhsap chuan hri dona atana tha leh zung bakah mahni hun hlu tak sengtu zawng zawngte chuangah lawmthu a sawi bawk. Pu Zothanmawia chuan hri len tirh atanga sawrkar hriattirna chhuah leh training neih tawh zawng zawngte chu hri leng mek dona atan hian hman tangkai a pawimawh hle thu a sawi lang bawk a ni.

He hunah hian Dr. Lalngaihawmi Chhangte, Medical Officer chuan TrueNat khawl hnathawh dan leh laboratory kalpui dan tur tlangpui an hrilhfiah a, RNA extractor pahnih awmin tum khatah Sample pahnih endik theih a nih thu leh result hre turin darkar khat leh a chanve vel hun a mamawh thute a sawi lang a, TrueNat enkawltu tur hian Khawzawl District Hospital-ah sawrkarin thawktu an rawn dahbelh thu a sawi lang bawk a ni.

Vawiina TrueNat khawl thar hawnnaah hian Khawzawl SP Pu PC Lalchunglura, Addl. DC Pu Lalrohlua, Dr. Zikpuii MO, Village Council leh NGO hrang hrang aiawh thawktu dangte bakah media mite an tel a ni.