Tun thla June ni 19 atanga 21 chhunga I&PR department leh MJA Champhai district ten Ngopa tlangdunga sawrkar hmalakna project kal lai mek an fan leh zirchian thlirletna chu vawiin khan Champhai DIPRO  Pisa-ah neih a ni.

Review meeting-ah Dr Lallawmkima District Information and Public Relations Officer, Champhai chuan thawhhona tha leh boruak muanawm tak hnuaia Chanchinbumite tana Sawrkar hmasawnna ruhrel en leh zirchianna hun tha tak  neih ani thei chu lawmawm a tih thu a sawi a. Press Study Tour kal ten an thil hmuh leh zirchianna te hmanga sawrkar hmalakmekte puangzar a, duhkhawp tawk loh leh insiamthatna tura awma an hriatte thahnemngai taka Sawrkar department  hnena thlen a tawiawm turin a chah a. Champhai District media-te tawiawmna leh thlawpna tha tak department in a dawn thinnaah lawmthu a sawi a ni.

He hunah hian Pu C.Lalhnunpuia, President MJA Champhai District chuan Study Tour report kimchang a pe a. Media mite mamawhtu leh harsatna thlen thinte nodal department in a ngaihven thinna leh ngaihsaknaah lawmthu a sawi a ni. Tour member dangte leh Senior Member ten tour report leh an vei zawng leh lawmthu sawina hun an nei  a. District chhunga Sawrkarah hmasawnna ruhrel siam mek an tlawhte chu tha thawkhat viau a an hriat thu leh project site pawhtu kawngah te   khawl lian leh changtlung zawkte awlsam taka lakluh anih theihnan  leh  nakin zela chhawrtlak anih zel theihnan turin tun aia rinawm leh tha zawka thawmthat nise an ti a. Mizoram Village Council  tha bera thlan Chiahpui khua chuan Champhai  District a chawimawi hle a an hriat thu leh ram ngaw humhalha tuihna siam kawnga an hmalakna chu fakawm an ti a, hei hian khaw chhehvel te thlenga tui hnianghnar  taka pe thei dawn a an hriat thu an tarlang a. Heng bakah hian Press Study a kalte chuan ruihhlo leh a kaihhnawih dangte then thianghlim kawnga kumin February thla atanga Vaikhawtlang khawtlang mipuite tha thlah lova ngawrh taka khaw daia an duty thin chu fakawm an tih thu an sawi a. Hmunhma an tlawhna hrang hranga  Sawrkar official leh khawtlang hruaitute lo dawnsawn thinnaah lawmthu an sawi a. Mizoram sawrkar in I&PR Department kaltlanga Chanchinbumite tana Sawrkar hmalakna te zirchianga enfiahna hun Press Study Tour a buatsaih thin chu hlawkthlak leh zawngchhang thlak hle a an hriat thu leh chhunzawm zel nise tha an tih thu an sawi a ni.

Champhai District Press Study Tour team te hian DIPRO Champhai kaihhruainain nithum chhung chamin Champhai District hmar lam Ngopa tlangdung June Ni 19-21, 2019 khan an fang a. June Ni 19 khan  NABARD Sum Velbelchhe 49.6 hmanga Leiva tui tha chakna hmanga kum chanve chhunga Kawlphetha MW 4 pe chhuak thei tur Kawlbem Small Hydel Project  hnathawk mek chu tlawhin Official te nen an en ho a. June Ni 19 khan Chiahpui khawbula NABARD (RIDF-XXIII) sum cheng vaibelchhe 8.48 leh State Matching share cheng vaibelchhe 0.94 senga siam mek Combined Chiahpui, NE Khawdungsei & Khawkawn (Solar Pumping)  Water Supply Scheme  chu PHE official te nen an enfiah leh a, hemi hnu hian Ngopa Thingpui huan tlawhin a  sawngbawl dante an zirchiang leh bawk a ni.