Vawiin khan Mizoram Remote Sensing Application Centre (MIRSAC) leh Deputy Commissioner, Lunglei District te tangkawp buatsaihin Convention Center, Lunglei ah khuarel hrang hrang leh sik leh sa inthlak danglam avanga chhiatna thleng thei chungchang ah Awareness cum Workshop neih a ni a, Lunglei khawpui leilung awm dan 3D model chu zir ho a ni bawk.

He inkhawm kaihruaitu Pi K. Lalrinzuali, Deputy Commissioner chuan Directorate of Science and Technology hmalaknain zirhona pawimawh leh mipuite mamawh tak buatsaih a ni chu lawmawm a tih thu sawiin kalkhawmte’n an hlawkpui theuh theihna turin duhsakna a hlan a. Sik leh sa inthlak danglam chuan khawvel ram hrang hrang a nghawng mek a, Mizoram pawh a ralbang theilo a ni tiin ram kan tihchhiat leh hemi avanga boruak, sik leh sa danglam nasa lutuk veng leh siamtha leh turin theihtawp a tan kan lak a tul a ni, a ti.

He programme ah hian Dr. R.K. Lallianthanga, Chief Scientific Officer, Directorate of Science & Technology, Government of Mizoram chuan thu a sawi a, MIRSAC hnathawh, project hrang hrang an khawih zing ah chhiatrupna thleng thei laka Mizoram chhunga district hrang hrang te dinhmun chu satellite thlalak te nen a tangkawp a an zirna chu zawh thawkhat anih tawh thu a sawi a. District hrang hrang ah programme siam in sorkar hnathawk, mipui te leh zirlai te hnena inhrilhhriatna hun neih mek zel anih thu a sawi bawk. Tin, tunlai thiamna chi hrang hrang hmangin Mizoram leilung 3 Dimension thlalak chu a mamawh tu ten tangkai taka an hman theih turin an siam thin thu a sawi bawk.

Dr R.K. Lallianthanga chuan sik leh sa inthlak danglam leh chumi in a nghawng chungchang state climate change cell in zirna an kalpui mek thu sawi leh in, mipuite chu sik leh sa danglam zel tur venna kawnga theih ang tawka tan la tura a fuih rualin sik leh sa lo danglam zelah hian kan nun khawchhuahna turin kan eizawn dan kawng pawh kan insiamrem ve a ngaih thu a sawi bawk.

Technical session ah Pu ZD Laltanpuia, Senior Scientist, MIRSAC chuan Hazard Risk and Vulnerability Analysis (HRVA) tih thupui a hmangin chhiatrupna thleng thei laka Lunglei district dinhmun an zirna tlangpui a tarlang a. Pu Lalthanpuia, Scientist-B, Mizoram State Climate Change Cell in District Level Climate Vulnerability Profile of Mizoram tih thupui hmangin sik leh sa inthlak danglam vanga chhiatna laka Mizoram chhunga district hrang hrang te dinhmun khaikhinna a sawi a. Pu R. Lalfamkima, Scientist, MIRSAC chuan Digital 3-D Terrain Mapping & Modelling (3DTM) hmanga Lunglei khawpui chhung leilung 3-D thlalak an siam te chu kalkhawm te entirin a hrilfiah bawk. Pu Lalramdina, Scientist, MIRSAC in lawmthu sawina hun a hman zawh ah programme hi tih tawp a ni.

He inkhawm ah hian Lunglei town area chhunga sorkar department hrang hrang aiawh te, village Council hrang hrang atang te, YMA, MHIP leh MUP sub headquarters hruaitute leh branch hrang hrang atangte, Lunglei Government College te, Govt. Venglai High School, Lunglei naupangte leh zirtirtute mai bakah sawm bik thenkhat te an tel a ni.

Attachment

  • Loading attachment...