I&PR Department kaltlanga January Ni 5 atanga February Ni 9, 2019 chhunga Mizoram sawrkarin Chanchinbumite tana Press Study Tour a buatsaih tak thlirletna leh report peka ngaihthlakna hun vawiin chawhnu khan I&PR Conference Hall, CHANEM Building, Champhaiah neih a ni.

He hun hi Dr Lallawmkima DIPRO Champhai chuan kaihruaiin Sawrkarin Chanchinbumite tan State danga sawrkar kalphung leh hmalaknate zirchiang turin Study Tour a duan fo thin thu a sawi a. Press Study Tour a kalte chu Mizoramin a thatpui tur leh tih ve tlak tura duhawmte chu sawrkar lama thlen tur leh an thil hmuh leh hriatte chu zau zawka mipuite zirtur chhawng turin a chah a. Sawrkarin Journalist-te  tana hamthatna leh duhsakna a pek thinte tarlangin, Sawrkar dik leh tha siam kawngah theihtawp chhuahpuiah a sawm nghal a ni.

He hunah hian Tour report ngaihthlak a ni a, Champhai District atanga Press Study Tour-a kal mi pali ten an kalna theuh chanchin leh thilhmuh leh zirte an sawi zau a. Mizoram tana tha tur leh entawn tura an duhte an tarlang tel a ni. Pu Lalhlupuia, Editor Lenrual Daily Newspaper-in Nagaland fan chanchin a report a, Pu C.Lalhnunpuia, DDK Correspondent, President MJA Champhai District-in Kolkatta khawpui zin chanchin a report a,  Pu Lalhmingliana Pasaltha Daily Newspaper News Editor  Sikkim zin report a pek bakah Pi Lalthlamuani Ralte, Editor, Si Ar Daily Newspaper-in Meghalaya Press Tour report a pe bawk a. Sawrkarin Journalist-te tana Press Study Tour a buatsaih thin chu hlawkthlak hle a an hriat thu leh nakin zel pawha chhunzawm zel theih nise tha  an ti bawk.