No.3653/2021-2022

Aizawl 13th January, 2022: Vawiin khan I&PR Conference Hall, Champhaiah PHED Champhai buatsaihin ni 2 chhung awh tur Pump Operator leh Electrician-te tan Skill Training Jal Jeevan Mission (JJM) kaltlangin buatsaih tan a ni. He hun hi Er. C. Lalhmachhuana, SE, PHED Champhai WATSAN Circle chuan khuallian ni a hmanpuiin training hi a hawng a ni.

Er. ZD Dengthuama, EE, PHED & Member Secretary, JJM, Champhai District kaihhruaiah khuallian Er. C.Lalhmachhuana chuan Mizoramin tui hnianghnar a neih theih nan hma nasa taka lak zel a nih thu tarlangin, nizung chakna hmanga tui pump mek a nih thu pawh a sawi a. Training a kalkhawmte chu tui hnianghnar zawk neih theih nana mawhphurtu pawimawh tak an nih anga theihtawp chhuah theuh turin a chah a ni.

He hunah hian Champhai District chhung khaw 18 atangin Pump operator leh Electrician-te training chhim turin an kalkhawm a. IC Engine, Pumping Scheme, Electric Power System leh Solar Pumping Scheme chungchang zirtirna pek an ni a. Er. ZD Dengthuama EE, PHED Champhai WATSAN Division, Er. Vanlalmuanawma SDO, PHED Champhai Project Sub- Division, Pu Kaleba Lalhruaizela, JE, PHED Champhai WATSAN Division leh Pu R. Lalthanzama, P& V Eastern Engineer Private Ltd. ten zirtirna hi an pe a ni.

Ruahman dan chuan naktuk hian Tuipui Pump House leh Kelkang Solar Pump an tlawh dawn a, a hmunah khawl hnathawh dan hrang hrang an zirho dawn a ni.

Sawrkar laipui hmalakna Jal Jeevan Mission (JJM) kaltlangin kum 2024 ah thingtlang khua in tinah tui connection pek vek hman tum a ni a. Tui connection pek hnua a enkawl leh siamthat hna khaw tina WATSAN Committee kutah dah a nih tawh dawn avangin lo inpuahchah lawk nan skill training hi buatsaih a ni.