No.3652/2021-2022

Aizawl, the 13th January, 2022: RBI puihna kaltlanga SBI bultum RBI Moneywise Centre for Financial Literacy (CFL), Champhai chu vawiin chawhma khan DC Office Ground Floor, Keifangtlangah Addl. DC Champhai Pu Henry C. Lalrawnkima chuan a hawng.

Pu Henry C.Lalrawnkima chuan District tana thil thar RBI Moneywise Centre for Financial Literacy (CFL) Champhaia kalpui a ni tur chu lawmawm a tih thu sawiin, CFL chu Bank leh Financial institution hrang hrangte dawr leh chhawr tangkai kawngah mipuite mit tihvar saka kawng kawhhmuhtu pawimawh tak a ni, a ti a. Sawkar laipui chuan khua leh tui zawng zawngten Bank kalphung an hmelhriata hamthatna an dawn theih nan nasa taka hma a lak mek zel thu a tarlang a. Sawrkar scheme pawimawh tak takte rethei leh thingtlang chengker zawka awm ten an chhawr tangkai ngei theihna tura inzirtir kawnga thawk tur CFL chuan hmasawnna a thlen ngei a beisei thu sawiin, Centre for Financial Literacy kalpui tura tih CRISIL Foundation chuan CSR khawih tura din a nih ang ngeia awmze nei taka hma a lak ngei a beisei thu a sawi bawk.

District Administration-in District mipuite tana tangkai taka hna thawk tur an ni tih hriain RBI Moneywise Centre for Financial Literacy te inbunna tur hmun DC Office-ah Room a luahtir chungchang thu pawh sawiin, District mipuite mamawhna zawn hria a, Bank kalphung leh Bank kaltlanga hamthatna awmte chhawr tangkaitu ni thei tura tibengvartu leh puih an ngaihna zawna puitu ni thei tura inhawng turin a fuih a. Thahnemngai taka thawk tura chahin an kalzelna turah duhsakna a hlan a ni.

He hun hi Pu C. Lalthlengliana, Centre Manager, Centre for Financial Literacy (CFL), Champhai chuan a kaihruai a. Rev C. Lalchhuanawma'n hunserh a hmang a. Sawm bik NABARD leh Bank hotute hnen atangin thusawi ngaihthlak a ni a, CFL kalzelna turah tawiawma thawhhopui an inhuam reng thu an sawi bawk.

FLC project in a tum ber chu thingtlang mite hnena Financial Literacy pek leh Financial inclusion tam thei ang ber kalpui a ni a. A bikin bank awmlohna khuaa chengte hnena financial institution leh social welfare scheme hrang hrangte banphaka chhawp chhuah sak chu a tum lian ber a ni.

RBI Moneywise Centre for Financial Literacy (CFL) hi Reserve Bank of India hmalakna peng pakhat a ni a. He hmalakna hi CRISIL Foundation kaltlangin Northeast State pali a kalpui tan mek a ni a, chumi zingah chuan Mizoram pawh telh a ni. Mizoram bikah chuan District panga - Aizawl District, Champhai District, Serchhip District, Lawngtlai District leh Mamit District-ah te hmalak tum a ni a. CRISIL Foundation hi CRISIL Ltd. peng pakhat public charitable trust, CSR enkawl tura tih an ni a. March 2013 khan din niin, Mumbai, Maharashtra-ah an inkhuar a ni. CFL Champhai hian Champhai, Ngopa leh Khawzawl RD Block-te vil turin thawktu pali awmin bul an tan dawn a ni.