410/2026-2027

Champhai, dated 7th May, 2026: Vawiin chawhma dar 11 khan Champhai District chhunga raltlante hnena tanpuina pek dan tur (humanitarian assistance) chungchanga sawihoin District Administration leh tlawmngai pawlte DC Conference Hall, Keifangtlangah an thukhawm.

He hun hi District Bawrhsap Pu Mohammad Aaquib chuan kaihruaiin Mizorama Myanmar atanga rawn raltlante leh a thlengtu khawtlang mipui harsa zawkte tana himna leh eizawnna siamsak tura hmalakna PATHRISE Project 2026 chungchang thlirho a ni a, PATHRISE Project 2026 hi raltlante leh anmahni thlengtu khawtlang mipuite mamawh hrang hrang phuhruk nana ruahmanna lian leh pawimawh tak a ni.

PATHRISE Project 2026 hnuaia thawktute hnen atangin raltlan ten an rawn belh khawtlang mipuite chhawmdawlna tura hma an lo lak tawhna leh hmalakna tur hmachhawp an la neih te ngaihthlak a ni a, Myanmar atanga rawn raltlante hriattur pawimawh tak tak dan leh dun zirtir te, Umbrella Protection an tih hnuaia activities an lo neih tawh hrang hrang - naupangte venhimna chungchang te zirtirna leh pawimawh hrang hrangah hmalak an tum dan te chipchiar taka ngaihthlak a ni.

PATHRISE Project 2026 hian Indo leh buaina avanga thil pawi tak tak tawng, rilru lam hliam tuarte hnena rilru damna tura puih leh thurawn pek te, Naupang leh hmeichhiate himna tura hmun him siam leh hleilenna laka venhim hna thawh te, Raltlante tana lehkha pawimawh neih dan tur kawhhmuh a, an dikna chanvo hrilhhriat leh sorkar leh NGO atanga tanpuina an dawn theih nan a puih te chu an hnathawh pawimawh tak zing ami a ni a, midang puihna ringawt lova mahni ke a an din theih nan leh eizawnna ngelnghet an neih theih nan ruahmanna pawh siam a ni a, Mizoram chhunga eizawnna theih tur ang chi leh thiamthil tangkai zirtir te, eizawnna bul an tan theih nan sum fai a tanpui leh lo neih emaw ran vulh nana thlai chi leh rante a thlawna semin hma an la thin a ni. Raltlante leh Khawtlang mite'n inpumkhatna tha tak an neih theihna turin hma kawng hrang hrangin an la a, Raltlante an lo luh thut avanga tualchhung mite eizawnna leh neihsum lama harsatna lo thleng theite chhawk zangkhai a, Raltlan leh tualchhung mite inkarah inremna leh inlungrualna a awm theih nana hmalak chu an hnathawh lian ber pakhat a ni.

He hunah hian Health Department aiawha kalte pawhin raltlante tana damdawi lama chhawmdawlna an lo kalpui tawh dan te, dam lo an lo enkawl tawh dan report an pe a, Zoram Entu Pawl leh tlawmngai pawlte atangin hma an lak tawh dan report ngaihthlak a ni bawk. Raltlante mi note thlalak chu hmun tam zawkah tih zawh vek tawh a nih laiin hmun tlemtea raltlan tharte mit note thlalak hi la tih a nih loh avanga a rang thei ang bera hmalak nghal dan tur pawh meeting-ah hian an sawiho nghal.