411/2026-2027

Aizawl, the 7th May 2026: Vawiin khan Novotel Conference Hall, Guwahati-ah World Resources Institute (WRI) huaihawtin 'CSR Workshop on Clean Energy for Development in Northeast India' neih a ni a. Adviser to CM leh Mizoram CSR Cell Chairman ni Pu TBC Lalvenchhunga chu khualzahawm a ni.

Pu TBC Lalvenchhunga chuan, WRI in hmar-chhak bial pum huapa hetiang hun tha an buatsaih hi a lawmawm a. India ram pumpuia Corporate Social Responsibility (CSR) sum hman atanga chhutin Northeast region hian kan dawng tlem hle a. Hmarchhak state-te zingah pawh Mizoram chu CSR fund kan dawng tlem ber a ni. Hei hi siamthat a ngai a, tan kan lak tlan a tul. CSR hi vawi khat thilpek (one-time donation) ang maia ngaih a ni fo va, ram hmasawnna tura hun rei tak awh tur project leh programme rintlak kalpui theih a nihna hi kan hriat a tha, a ti.

Renewable Energy (RE) chungchanga Mizoram sorkar hmalaknate tarlangin, Sorkar laipui scheme 'PM Surya Ghar: Muft Bijli Yojana' (Roof-top Solar) chu chak zawka kalpui a nih theih nan Mizoram sorkar chuan central subsidy awmsa bakah state subsidy a pek belh a. Hma kan sawnpui hle. Solar Policy thar pawh duan a ni, a ti.

Hmasawnna tluantling nei tura Renewable Energy policy mumal tak neih a tul thu leh project hrang hrangte vawn that (maintenance) leh endik (monitoring) kawnga tan lak a ngaih thu a sawi bawk.

He hunah hian hmarchhak state hrang hrang atangin sorkar lama CSR buaipuitu hotute, CSR fund dawng thin Civil Society Organisations (CSO) hrang hrang aiawhte, bakah CSR fund petu Company Foundation hrang hrang aiawhte an tel a ni.

World Resources Institute (WRI) hi America (USA) behchhan non-profit research organisation lian tak, khawvel hmun hrang hranga inzar pharh an ni a. Workshop-ah hian Northeast leh hmun danga zirchianna an lo neih tawhte an tarlang a. Renewable energy lama CSR sum hman tangkai theih dan te, harsatna awm thinte leh hmasawn dan turte zirho a ni.

Pu TBC Lalvenchhunga hi Chief Minister's Office-a CSR Cell hotuten an tawiawm a ni.