1651/2023-2024

Champhai the 25th August, 2023 – Zoram Entu Pawl leh Catholic Relief Services (CRS) te tangkawp buatsaihin vawiin chawhnu khan Zion Veng Community Hall, Champhaiah Manipur leh Myanmar atanga lo kal raltlante hnenah tanpuina sem chhuah a ni a. Champhai DC Pu James Lalrinchhana chuan he hun hi a hmanpui a ni.

He hmalakna hnuaiah hian Basic Needs Support (Buhfai kg 125, thingpuife, bawnghnute powder, chi, chini, nutrela, dal, tel, blanket etc) Manipur raltlan chhungkaw 39 hnenah; Health Safety Kits (Bucket, plastic no, blanket, toothpaste, nail cutter etc) chhungkaw 30 hnenah leh hmeichhe tan bik a duan Dignity Kits (pads, underwear, antiseptic soap etc) mi 350 hnenah semchhuah a ni.

He hun hmanpuitu Champhai Bawrhsap Pu James Lalrinchhana chuan thu sawiin, raltlante hmakhua ngaia an mamawh hrang hrang thahnem tak buatsaih saktu Zoram Entu Pawl leh Catholic Relief Services te chu fakawm tiin, District mipuite aiawhin an chungah lawmthu a sawi a. Tun dinhmunah Champhai District-ah Myanmar atanga raltlan mi 12,000 leh Manipur atanga raltlan mi 400 vel an awm ni a chhut anih thu sawiin, an himna leh damna turin Mizoram mipuite leh Sawrkarin theihtawp a chhuah chhunzawm zel dawn a ni, a ti a. Raltlante pawh India ram Dan leh thuneihna hnuaia awm an ni tih hriaa, engti zawng maha Dan bawhchhe lo tur leh kawng engkima YMA leh VC-te thu awih thin turin a chah a. Kan hma lawka lo thleng tur Mizoram Assembly Election chu hlawhtling taka hmachhawn anih theihnan boruak ralmuang tak kan neih a tul takzet a ni tiin, kalkhawmte chu Dan kalh zawnga che lo turin a ngen a ni.

Vawiin program hi Pi Lalduhawmi, Project Manager Zoram Entu Pawl in a kaihruai a, Pu Savio Rangla, Project Officer CRS, Pu Robert Zoremtluanga, Chairman Raltlan Sub Committee, Sub Hqrs YMA leh midangten thu an sawi a ni.