1652/2023-2024

Dated Aizawl, the 25th August, 2023: Vawiin khan Chief Minister Pu Zoramthanga chuan Bairabi Civil Sub-Division thar, Kolasib district chu a hawng.

Chief Minister hian Bairabi SDO (Civil) Office Building thar leh Civil Sub Division thar lungphun a hawn hnuah a lawmna inkhawm hi NF Railway Platform ah buatsaih zui a ni a, a lawmna inkhawmah Pu K. Lalrinliana, Minister chu khualzahawm a ni.

He hunah hian Chief Minister chuan, hun rei tak an lo beisei tawh Civil SDO an neih tak avangin Bairabi mipuite lawmpuina a hlan a. Kan sawrkar hian hmasawnna hnaah pawh inrelbawlna lamah pawh kan ramin a mamawhte tihhlawhtlin zel a duh a ni, a ti. Tunah a thar mai a la nih avangin tihhmasawn zelna tur tam tak a la nei a, Office building lian tawk tak, a tul ang zela Department hrang hrang inbun ve theihna tur te, Quarters tha zawkte a mamawh dawn a ni. Pathian zarah hun thate kan nei zel a nih chuan chung hmabak te pawh chu kan thawk chho zel dawn a ni. Bairabi hi a pawimawh em avangin hripuiin min tuam lai pawhin a tihhmasawnna tur sum in dawng tha thawkhat hle a, Mamit lam panna kawngte, Zamuang lam kawngte, Kolasib lam kawngte, Hailakandi lam kawngpuite leh Tlawnglui lian laka invenna te pawh hmalakna tam tak kan nei a ni, a ti. Chief Minister hian heti tak maia Bairabi in hma a sawn chhan pakhat chu a bialtu MLA in a thawh that vang leh a inpekna vang a nih thu a tarlang bawk. Tunlaia kan chhehvela buaina hrang hrang leh raltlan tam tak lo luh chanchin sawiin Chief Minister chuan, heng harsatnate hi Pathian remruat ang zela zofate chunga lo thleng a nih ka ring a. Keini Mizoram chengte hi hmangaih taka lo tuamhlawma lo thlamuantu turin min ruat a, buaina te lo chhuak mah se a chin fel dan tur pawh min kawhhmuh ang tih ka ring tlat a; tum fel tak neiin Pathian hian min hruai a ni, tiin Pathianin Mizoram a kaihhruaizia a thiltawnte atangin a tarlang a ni.

Khualzahawm Pu K. Lalrinliana, bialtu MLA leh Minister, FCS&CA pawhin thusawiin hun rei tak kan lo nghah leh beisei tawh Civil Sub Division Office Bairabiin kan han nei thar hi ka lawm em em a. Kan sawrkarin Kolasib district leh Bairabi min hmangaihzia a lang chhuak nasa em em a ni. SDO Civil Administration in a ken tel sawrkar hmunhma dangte pawh theihtawpin kan umzui zel dawn a ni, a ti. Bairabi pawimawhna tlangpui tarlangin, Bairabi leh a chhehvel bialte inkalpawhna kawngpui sawrkarin a siam hrang hrangte pawh Minister hian a sawi lang a, hma kan sawn nasa em em a ni, a ti.

A lawmna inkhawm hi Pu John LT Sanga, DC, Kolasib in a kaihruai a, hun rei tak Bairabi mipuiten an lo beisei tawh SDO Civil Office an nei ta chu lawmawm a tih thu sawiin, ramri humhalhna leh hmalakna dang kawng tinrengah a tangkai hle dawn a ni, a ti. Pastor Jerry Zoliansanga'n hunserh hmangin Pu R. Lalfakawma, Chairman, Jt. VC Bairabi in khawtlang aiawhin lawmthu a sawi a, Bairabi Civil SDO hi kum 2001 atanga an lo dil tawh thin thu a tarlang a ni. A lawmna inkhawmah hian Bairabi khawtlang hruaitute leh tlawmngaipawl aiawh hrang hrang ten thusawina hun an hmang a, khawtlang mipuite pawhin an hlut hle a ni.

SDO chelhtu tur hi hun reiloteah sawrkarin a tihchhuah beisei a ni a, a thar lo awm hma atan tuna SDC Bairabi ni mek Dr. Lalramdintluanga, MCS, chu he mawhphurhna lo chelh lailawk tura ruat a ni.