1653/2023-2024

Aizawl, the 25th August2023: Vawiin chawhnu khan Mizoram New Secretariat Complex (MINECO ) Building – I kawtah kum 2 chhung India in Zalenna Kum 75-na champha phak puala lawmna a lo kalpui tawh, Azadi Ka Amrit Mahotsav kharna atana Campaign, Meri Maati, Mera Desh( Ka leilung, Ka ram) State Level Program chu neih a ni a. He hunah hian Pu Lalruatkima, Minister, RD, I&PR leh LR&S chu khuallian a ni.

Pu Lalruatkima, Minister, RD, I&PR leh LR&S chuan India in zalenna champha phak kum 75-na lawmna atan Azadi ka Amrit Mahotsav(AKAM) kum 2 a kalpui tak hnukharna pualin ‘Ka Leilung, Ka Ram’ tih campaign chu hlawhtling takin Mizoramah kalpui a ni a ti. Zalenna hlut zia leh zalenna sualtute kan ngaihlutzia te sawiin zalenna sualtute zahnna chibai a buk chhunzawm a. India ram a lo ropui zual zelna atan Mizoram mipuite chu theih tawp chhuah chhunzawm turin a sawm nghal bawk.

Pu Lalruatkima chuan vawiin zalenna sualtutute leh mihuaisen, ram tana nunna hlantute chawimawina niah hian Mizo te hi hnam huaisen kan ni tih hre thar leh turin Zoram mipui te a chah a. Hun harsa a lo thlena in kalsan ngai lo hnam kan nih avangin Mizo nih a nuam tih a sawi a. “Hun harsa leh hun thimah pawh inkilkawia,intanpui tawn a, intiphur tawn thin kan ni a. Harsatna tawh laia tanpuitu hmel aia hmeltha zawk a awm lo a, chuvangin Mizote hi Pu Rokunga lo sawi tawh angin Hnam Hmeltha kan ni”, a ti. Pu Lalruatkima chuan kan huaisenna te kan theihna te India tana hlan chungin midangte ruala ke pen zel a, Mizoram leh Mizo ang pawh a, midangte hnunga kal bik loa hmasawn kan tum a ngai a ti a. Mizoram lo ram dang kan neih loh avangin a venhim leh a tihhmasawn hi kan zavaia mawhphurhna a ni a ti a. Sawrkar hmalakna te theihtawpa thlawp chhunzawm zel tur leh ram hruaite pawh thlawp a, a tulnaah chuan khak a, khalh ngil a, an tan tawngtaisak thin zoram mipuite a sawm bawk a ni.

Inlawmna thu sawitu, Chief Secretary Dr Renu Sharma chuan Meri Maati, Mera Desh hlawhtling taka kalpui a nih chungchangah official te leh a thlawptu mipui chungah lawm thu a sawi a. Central Sawrkar hmalakna te that akin Mizoram chuan a thlawp thin nia sawiin Har Ghar Tiranga Campaign pawh Mizoramah chuan a hlawhtling hle a ni tih a sawi.

Meri Maati, Mera Desh hi August 9, 2023 atang khan Mizoramah kalpui tan a ni a. He campaign he Thingtlangah te, khawpui te deuh ah te, block level leh district level anga kalpui a ni a. Sports & Youth Services Department chu Nodal Department niin BDO te, SDO te, Bawrhsap te, Forest Department official leh Official dang te nen an thawk ho a. Campaign hun chhung hian Zalenna sualtute leh ram tana nunna chan te zawnchhuah hna te, heng mite puala program buatsaih te, hriatrengna lung phun te bakah thing tiak tam tak phun a ni.

Vawiina Meri Maati, Mera Desh Program hi Chief Secretary Dr Renu Sharma in a kaihruai a. Program bul tanna atan Khuallian leh Chief Secretary te chuan Secretariat Building –I hungna bulah Thingtiak an phun hmasa a. Chief Secretary in inlawmna thu sawiin program hi chhunzawm a ni a. Hemi zawhah hian Khuallian in India Hnam Puanzar a pawtparh a, India Hnam Hla ngaihthlak chhunzawm nghal a ni. Meri Maati, Mera Desh puala thu intiamna, Paanch Pran chhiar rual a ni leh a, Dr Lalrozama, State NodalOfficer & Secretary, Sports and Youth Services Department chuan Paanch Pran chhiar rual hi a kaihruai a ni. Veer ( Mihuaisen, pasaltha leh zalenna sualtute, etc..) chawimawina hun buatsaih chhunzawm a ni a. He hunah hian Category  4 huanga Veer te an tel vek theih loh avangin Category tin atangin mi pakhat zel thlan chhuah an ni a. Veer category 4 aiawha thlan chhuah te chu – Police Personnel atangin Pu C.Lalchuailova, Bawngkawn, Defence Personnel atangin Naik Vanlalzemawia, Mission Vengthlang, Veer Naris atangin  Sepoy Vanlalvena nupui Pi Zarzoliani, Electrict Veng leh Freedom Fighter atangin Pu Biakliana, Thakthing Veng te an ni.  Program  huntawp berah Chief Guest in Shilaphakalam, Zalenna sualtute hriatrengna lung khuhhawnna a nei leh bawk a ni.