1654/2023-2024

Aizawl, the 25th August, 2023: Mizoram Civil Service Association (MCSA) Conference vawi 47-na, McCabe Hall, Aijal Club-a hman chu vawiin chawhma dar 10 khan Deputy Chief Minister Pu Tawnluia'n khuallian niin a hmanpui a, MCSA buatsaih RAHBI Magazine a tlangzarh nghal bawk.

Khuallian Deputy Chief Minister Pu Tawnluia chuan ram rawngbawl kawngah chanvo hrang hrang a awm thu sawiin, mahni kuta tla chanvo theuhte ram leh hnam tan tia tha taka hlen zel chu mitinte mawhphurhna a ni, a ti a. Mizoram Civil Service Association member-te chu Sawrkar kutke pawimawh tak an nih avangin Sawkarin an tana hamthatna leh tul dangte a ngaihpawimawh sak thin a ni tiin, MCS te chu ram neitu nihna thinlung pu tlat tur leh public service nihna zawnah mipuite rawngbawl hna thahnemngai taka thawk zel turin a fuih a. An thiamna leh finnate a tangkai thei ang bera hmang tur te, zahawm taka awm zel tur leh hmasawnna thinlung pu tlat turtein a fuih a. Department hrang hranga hna pawimawh tak tak chelh an nih hlawm avangin midang nena thawkho thiam mi nih tum turin a chah bawk a. Tih dan phung pangngai maia lungawi lova, awlsam leh mawihnai zawk, mipuite tana zangkhai leh tha zawka hna thawh tum thin turin a chah bawk.

Hripui leng avanga kum 2 dawn nunphung a khaihlak thu leh sum leh pai hmuh tur angte hmuh a nih loh mai bakah hripui do nan te, thenawm ram buai avanga raltlan tuamhlawm leh hriat lawk loh chhiatna dang dang thleng avanga harsatna tawhte buaipui nan sum leh pai thahnem tak sen ral a nih thu sawiin, hemi avang hian hmasawnna tura ruahmanna awmte duh anga kalpui theih a ni ta lo a ni, a ti a. Hripui leng avanga dam khawchhuah chu Sawrkar ngaih pawimawh hmasak a nih thu leh hripui kian hnuah hmasawnna lam hawia theihtawp chhuah a nih thu tarlangin, hnathawh theih hun chhungah erawh theihtawp chhuah niin hmalaknate a chhiat lem loh thu a sawi a. Mipuite himna leh ralmuanna chu hmasawnna tura pawimawh hmasa a nih thu sawiin, Sawrkar flagship program SEDP hnuaia kalpui Family Oriented SEDP (FO-SEDP) Phase-1 kaltlangin chhungkaw 60,000 te tanpuina Rs. 50,000/- pek an ni a, Phase-2 first installment chhungkaw 60,000 tan September thla chhunga pek chhuah hman tum a ni, a ti bawk.

Pu Tawnluia chuan MCSA khawmpui hmanpui tura sawm a ni chu lawmawm a tih thu leh Sawrkar hna vuanlai mai bakah pension tawhte uapna hnuaia hun tha tak hmanho a ni leh inhriatpawhtawnna hun tha tak buatsaih a ni chu finthlak a tih thu a sawi a. Sum leh pai harsatna karah thawktu indaihlohna phuhru turin Sawrkarin tan a lak zel thu leh service tih changtlun leh tih phuisui kawngah pawh ngaihtuahna a sen thu a sawi a. Pawl thil thlente a tul anga bawhzui tum a nih thu a sawi a, an kalzelna turah duhsakna a hlan a ni.

Thusawitu dang Pu H. Lianzela, President, MCSA chuan pawl hmalakna hrang hrang sawifiahin mamawhte a tarlang a. Nikum conference leh vawiin inkarah pawl member promotion hmu 39, superannuation pension 3 leh IAS a hlankai 4 an awm thu sawiin, pawl member discipline hrang hrang atanga kalkhawmte chu an thiamnate Mizoram tana tangkai taka hman tum zel turin a chah a. Democracy chawinungtu, ram leh mipui rawngbawltu tha nih tum tur leh tunlai thiamna mila insiamrem thiam mi nih tum turin pawl member kalkhawmte a chah a ni.

Conference hi session thum a then niin, hun hmasa ber Conference hawnna programme hi Pu V. Lalengmawia, Vice President, MCSA chuan kaihruaiin kalkhawmte lawmna thu a sawi a. Honorary Member chatuan ram pan ta mi 6, Pu H.Remthanga, Pu R.Hrangtawna, Pu Hrelian Chinzah, Pu H.Raltawna, Pu C.Kanchha leh Pu K.Lalmuana te sunna hun Pu Zoremthara Ralte, Asst. General Secretary kaihhruaiin neih a ni a. MCS Officer thar 15 te lawmna hun Sr. Adviser Dr. H.Lalthlangliana kaihhruaiin hman a ni a. Pi Teresy Vanlalhruaii, Sr. Adviser, MCSA in lawmthu sawiin hun hman a khar a ni.

Hun hnihnaah hian MCSA President Pu H.Lianzela kaihhruaiin rorel inkhawm neih a ni a. Report hrang hrangte ngaihthlak a nih bakah pawl member IAS a kaisang mi 4, Pu Zorammuana, Pi Ramdinliani, Pu David Lalthantluanga leh Pi Maria C.T Zuali te lawmpuina hun hman a ni a, hemi hnu hian hruaitu thar an thlang nghal bawk.