860/2024-2025

Champhai, the 19th June, 2024: Legal Metrology Department, Champhai kaltlanga nikum chhunga ram dang atanga dan lova cigarette lakluh man packet 39000, brand hrang hrang 7, tualchhung rate-a chhuta cheng nuai 20 (Rs. 20,00,000) man hu chu vawiin chawhma dar 11:00 khan Controller of Legal Metrology thupek leh District Magistrate hriatpuinain Mizoram Legal Metrology (Enforcement) Rules, 2010 hnuaia rule 19, sub-rule (4) & (6) tlawhchhanin Legal Metrology Office tual, Champhai Vengsang-ah tihchhiat a ni.

He hun hmanpuitu District Magistrate Pu James Lalrinchhana chuan entir nei programme pawimawh tak, dan lova cigarette lakluh leh zawrh mante tihralna hun hman a ni chu tha a tih thu sawiin, mipuite zirtir leh dan lova thil tih do kawngah rah tha a chhuah ngei a beisei thu a sawi a. Mipui rawngbawl sak leh dan lova thil tih do kawnga Legal Metrology-te hmalakna fakawm a tih thu sawiin, thawktu indaihlohnate lang lova theihtawp chhuaha dan lova hmalakna an do thin chu chhuanawm a tih thu a tarlang bawk.

Pu James Lalrinchhana chuan meizial zuk chu ruihhlo dang ti tura kailawn hmasa a nih thu tarlangin, chhiah chawi lova dan lova cigarette lakuhin ram sum leh pai dinhmunah nghawng nasa tak a neih thu a sawi a. Legal Metrology-te  thawhpuitu District Anti-Tobacco Squad-te thahnemngaihna fakawm a ti a. Vantlang hmun pawimawh, puipunna leh zirna in leh a chhehvel hnaiah meizial zuk leh zawrh khap tlat a ni tih sawiin, dan lova hmalakna do kawngah leh ruihhlo khawih that loh zia inzirir kawngah tun aia tanlak lehzual a tul thu a sawi a. Hemi hnu hian dan lova lakluh leh zawrh chhuah cigarette mante tihchhiat bultan nan District Magistrate chuan kut a thlak a ni.

He hun puala inkhawm tawi kaihruaitu Pu V. Lalfakzuala, Assistant Controller, Legal Metrology, Champhai chuan Legal Metrology (Packaged Commodities) Rules 2011 rule 6 leh 'The Legal Metrology Act, 2009 section 18 in thuneihna a pek angin dan bawhchhiaa lakluh leh zawrh chhuah foreign cigarette-te man thin an ni, a ti a. Dan lova cigarette lakuh avangin cheng vaibelchhe sing khat chuang cigarette atanga chhiah hmuh tur a kiam phah thu a tarlang a. Dan lova hmalakna do kawnga Legal Metrology-te theihtawp chhuaha thlawp thintu District Anti-Tobacco Squad, Police leh Excise Department-te chungah lawmthu a sawi a. Dan lova lakluh cigarette te'n chhiah an chawi lova, declaration mumal an nei lova, central excise duty leh GST chawi lo an nih bakah dan hnuaia zawrh chhuah thin cigarette hralhna chena a nghawng avangin man thin an ni, a ti bawk.

Dan lova cigarette lakluh leh zawrh mante tihchhiatna hunah hian Pu Felix Lalruatsanga, Inspector, Legal Metrology, Champhaiin report a pe a. Champhai District Anti-Tobacco Squad atangin thusawi ngaihthlak a ni bawk.

He hunah hian Dr. Lallawmkima, DIPRO Champhai, Legal Metrology Department thawktute leh Champhai District Anti-Tobacco Squad-te an tel a ni.