861/2024-2025

Dated Siaha, 19th June 2024 : Vawiin chawhma dar 11 khan Mara  Autonomous District Council (MADC)  hnuaia  07- Chakhei MDC Constituency By- Election tura candidate- te tan  Pu V.L. Hruaizela Khiangte, Returning Officer leh  District Election Officer (DEO) nibawk Office Chamber - ah Scrutiny neih a ni a,  Candidate- te hian Scrutiny hi an paltlang vek.

Pu V.L. Hruaizela Khiangte, Returning Officer (RO) chuan Candidate- te chunga lawmthu sawina a nei hmasa a. By-election tura an campaign hunah mimal anga inbeihna nei lo tur leh ram leh khawtlang tana thil tha an tih tum, mipuite tana thlantlin tlak an nihna  lai zawk sawi uar turin a chah a. Ram leh hnam hruaitu ni tur chuan mahni hmasialloh a pawimawh hle tih tarlangin, mahni aia khawtlang mipuite ngaipawimawh a, an tana thawk  fo turin a fuih a. Inthlanna felfai leh thianghlim tak awm turin Candidate- te chu thawhpuiah sawmin, by-election tur atan duhsakna a hlan nghal bawk.

MADC   hnuaia  07- Chakhei MDC Constituency By- Election tur hian political party pathum atangin  - Albert TT. Sachu (BJP), T.Essa (ZPM)  leh K.C. Ngobei (MNF) ten nimin lamah khan hming an lo pe lut tawh a. Vawiin ah hian Affidavit leh Document thil tel ngai ang angte chu endik (scrutinised) niin, sawiselna engmah awm loin  candidate-te hian endikna hi an paltlang vek a ni.

07- Chakhei  MDC bial hi a bialtu, Pu K. Hrahmo chuan Mizoram State Legislative Assembly (MLA) inthlanpui, 2023-ah 40-Palak (ST)  A/C bial aṭanga MLA-a thlan tlin a nih hnuah a chhuahsan a; bial ruak a nih tak avangin Mizoram State Election Commission chuan by-election nei turin ruahmanna a siam ta a ni.

Ruahman lawk dan chuan June ni 28, 2024 (zirtawpni) zing dar 7:00 leh tlai dar 5:00 inkarah vote thlak a ni ang a. Vote tlate hi July ni 2, 2024 (thawhlehni)-ah chhiar a ni ang.

Vawiin scrutiny neih naah hian Candidate-te hi an agent pakhat theuhin an tawiawm a, Pu Abraham Beirazi Khithie (ARO) chuan a telpui bawk.