No.3880/2021-2022
Aizawl the 2nd February, 2022: Champhai Forest Division leh State Medicinal Plants Board (SMPB) Mizoram tangkawpte chuan vawiin khan Resource Augmentation of Medicinal Plants (RAMP) project kaltlangin ramhmul damdawi awm tawhsa tihpun leh venhim dan tur zirhona I&PR Conference Hall, CHANEM Building-ah an buatsaih. He hunah Hnahlan, Zote leh Khawhai khuaa Village Forest Development Committee (VFDC) member-te bakah Champhai Forest Division hnuaia thawktute an tel a ni.

He hun hmanpuitu Pu Lalduhthlana, DFO Champhai chuan State Medicinal Plants Board leh Department tangkawpin Champhaia ramhmul damdawi chungchang zirhona a buatsaih thei chu lawmawm a tih thu a sawi a. Champhai Forest Division hnuaia Village Forest Development Committee 4; Zote, Hnahlan, Ngopa leh Khawhaiah te ramhmul damdawi awm tawhsa belhchhah tura phunbelh, humhalh leh enkawl chhunzawm kawnga hmalakna Resource Augmentation of Medicinal Plants (RAMP) project kalpui mek a nih thu leh, Farkawn VFDC hnuaiah ramhmul damdawi awm tawhsate a nih ang anga venhima tihchangtlunna tura hmalakna Medicinal Plants Conservation and Development Area (MPCDA) project kalpui mek a nih thu a sawi bawk.

Kum 2018-2019 atanga kalpui tan RAMP project, kum 2 chuang dawn funding a khaihlak hnua tharthawh leh a ni chu lawmawm a tih thu sawiin, kumin fur thingphun hunah uluk takin hlawhtling taka ramhmul damdawi tam zawk phunbelh tum a ni, a ti a. Kalkhawmte chu ruahmanna leh ngaihtuahna felfai leh awmze nei tak senhopuiah a sawm a. Sawrkarin project tha tak a duan leh training a huaihawt thin hlawhtlinna leh hlawkna teltu chu khawtlang mipuite an ni tih hria a, chhawr tangkaia hlawkpui thei tura theihtawp chhuah turin VFDC member-te leh Department hnuaia thawktute a chah a ni.

He hun hi Pu F.Lalnunhlima, RO, Champhai Forest Range chuan kaihruaiin kalkhawmte lawmna thu a sawi a. Resource Person Pu B.Lalbiakremmawia, Project Manager, State Medicinal Plants Board, Mizoram hnen atangin ramhmul damdawi chungchang, hlutna leh humhalh tulnate ngaihthlak a ni a. Kan chhehvela awm ramhmul damdawi hlu tak takte chu nakin zel thlenga kan chhawr tangkai theih tur thil an nih thu tarlangin, training chhimtute chu ramhmul damdawi chereu zel tur ven kawnga ruahmanna felfai zawk nei a, ramhmul damdawi humhalh leh renchem taka hman thiam kawnga midangte zirtirtu nih tum turin a chah a ni.

He hunah hian zawhna leh chhanna hun hman niin, kalkhawmten tawnhriat an neih hrang hrangte an sawi bawk a. RO Champhaiin lawmthu sawiin training hi a khar a ni.

Ruahman dan chuan naktuk February ni 3, 2022 hian Farkawn VFDC member leh Forest Department hnuaia thawktute tan Medicinal Plants Conservation and Development Area (MPCDA) project chungchang zirhona Farkawnah buatsaih tum a ni.