No.3881/2021-2022

Ramtuk thla ni 2, 2022: Vawiin khan Lawngtlai DC Conference Hall-ah Bawrhsap Dr Andrew H. Vanlaldika hovin District administration, police, medical, incident commander, zonal officer, MJA, Central YLA leh veng thenkhat village council ai awhte chuan Lawngtlai khawpui chhunga COVID-19 hri leng dinhmun thlir hovin, hri darh zel tur venna kawnga hma lak dan tur hrang hrang an sawi ho.

Chairman Dr Andrew H. Vanlaldika chuan ram pumah hri kai dinhmunin ziaawm lam a pan hleithei lo tih sawiin, tun hnaiah Lawngtlai khawpui chhungah pawh hri kai pung leh hluai thei dinhmuna a din avangin khauh lehzual leh fimkhur lehzual zawka hma lakna kalpui a tul a ni, a ti.

Chief Medical Officer Dr LP Malsawma chuan tun dinhmuna Lawngtlai District chhunga hri kai dinhmun a tar lang a. Incident commander leh zonal officer te'n COVID-19 No Tolerance Week hman meka inkaihhruaina (SOP) leh khawsak phung tha (CAB) te an bial chhung mipuiin an zawm theih nana hma an lak dan leh an lekkawh dan report an pe a. Lawngtlai khawpui chhunga hri inkai darh a pun loh nana hma lak dan tur te zau taka sawi ho a ni.

Lawngtlai khawpui chhunga hri inkai darh zel tur ven nan village level task force on COVID-19 (VLTF) te chu tan la thar leh tura ngen ni se, a bik takin hri kai tam zualna vengah phei chuan uluk lehzuala duty kalpui leh tum ni se, tih a ni a. Bazar leh dawrah te, kohhran inkhawm leh chet velna hrang hrangah te, inneih inkhawm, mitthi vuina leh pun khawmna reng rengah te CAB tha taka zawm a nih theih nan khauh taka hma lak thar ni se, tih a ni.

Lawngtlai District thuneitute chuan COVID-19 hri laka him nan mipuite chu hmai tuam that, kut sil fai, mi dang nena inhnaih chilh loh leh fimkhurna tur hrang hrangte uluk taka zawm chhunzawm zel turin an ngen a ni.

He hunah hian COVID-19 No Tolerance Week pawh Mizoram pumah February ni 14, 2022 (Thawhtanni) zanlai dar 12:00 thleng pawh sei a nih thu tar lan niin, police, incident commander, zonal officer leh COVID-19 executive duty te chu ngawrh taka an duty chhunzawm tur thu leh inthlahdah leh dan bawhchhia chu ngaihhnathiamna awm lova an hrem zel dawn thu tar lan a ni. January ni 17, 2022 atanga Lawngtlai District chhunga COVID-19 no tolerance kalpui mekah nimin thleng khan dan bawhchhia mi 80 man tawh niin, pawisa chawitir zat tling khawm chu Rs 8,200/- a tling tawh a ni.

CMO report atanga a lan danin, tun dinhmunah Lawngtlai District chhungah COVID-19 hri kai mek mi 158 an awm a. Lawngtlai khawpui chhung bikah chuan hri kai mek mi 114 awmin, an zinga mi 12 chu Myanmar raltlan an ni. Lawngtlai District chhungah hian Myanmar atanga raltlan lo lut mi 5,300 chhinchhiah tawh an ni a. Chu'ng zingah chuan mi 298-in hri kai tawhin, thihpui mi 1 a awm tawh a ni.

COVID-19 hri danna pek chungchangah February ni 1, 2022 thleng khan Lawngtlai District chhungah kum 18 chin chung lam mi 72,758 chuan vaccine dose khatna la tawhin, vaccine la thei tura ngaih mi 82,359 atanga chhutin 88.30% a ni a. Dose la kim tawh hi mi 44,827 awm thungin, 61.60% an ni a. Precaution dose la tawh mi 467 an awm bawk a. Raltlan zingah dose khat la tawh mi 1,553 leh dose hnih la kim tawh mi 336 an awm bawk.

January ni 7, 2022 atang khan kum 15 atanga 17 inkarte COVID-19 hri danna pek tan a ni a. Lawngtlai District-a kum 15 - 17 inkar hri danna la thei tura ngaih mi 5,384 atangin mi 4,588 te'n dose khatna la tawhin, hri danna la tawh hi 85.20% an ni.