No.1073/2021-2022

Dated Champhai, the 22nd June, 2021: Vawiin chawhnu khan Champhai District Bawrhsap Pi Maria C.T Zuali hovin Champhai District chhung Indo-Myanmar ramri kai khaw hrang hranga inkhuahkhirhna leh a kaihhnawih chungchang relin DC Conference Hall-ah thutkhawm a ni.

Bawrhsap Pi Maria C.T Zuali chuan ramri depa awm leh hrileng laka fimkhur ngaih zualna Champhai District-ah hrileng pahnih, Covid-19 leh African Swine Fever ven hna lungrual taka kalpui a ni leh, tun thlenga hrileng darh huk thei reng khuahkhirh ani chu lawmawm a tih thu a sawi a. Hrikai darh tur venga a thla tel lockdown kalpui chhunzawm a nih chungchang pawh sawiin, inthlahdah leh thuawih loh avanga hri putru a awm palh chuan kan zavai himna a derthawng thei a, fimkhur taka kan tanho zel angai a ni, a ti a. Hun rei tak chhung Covid-19 hrileng do kawngah tha leh zung tam tak senral a ni a, hmabak chin hriat a nih loh avangin rilru nei deuha tanho thiam a ngai takzet a ni, a ti bawk.

Champhai SP Pu Lalrinpuia Varte pawhin thusawiin, VLTF te chu sawrkarin dan ang thlapa a din leh kut ke ber an nih anga dan tlawhchhan chung zela hma la thin turin a chah a. MCPC Act, 2020 hnuaia an thuneihna leh VLTF inkaihhruainate chu ennawn fova tangkai taka hmang turin a chah bawk a. Dan bawhchhia leh ruihhlo an mante dan hnuaia hrem an nih ngei theihna turin Incident commander emaw, Police-te hnena hrilhhre vat thin turin a chah a. State dangte neih ve loh leh entawn an nih angin VLTF zahawmna leh mawina hum zel kawngah theihtawp chhuah turin a chah bawk a ni.

Meeting-ah hian ramri khar a nih mek lai leh, Free Movement Regime tihtawp lailawk a nih lai reng chunga dan kalha ramri kana mihring lutchhuak, bungrua leh ruihhlo lakluh tum an awm thin thute tarlan niin, dan lova mihring lut chhuak, bungrua, ran leh ruihhlo tawlh thinte chu khauh takin thukhat vuaa theihtawp chhuaha do tlan zel nise tih a ni a. Thenawm ramah Covid-19 hrikai an pun zel avangin fimkhur chhunzawm zel nise, ramri dep maia awm Champhai District chu hri inkaidarh huk theihna hmuna awm a nih hre rengin dan lova ramri kan leh chetvelna awm theihte khauh taka do tlan zel nise, ramri kana chhungkaw intlawhpawh loh nise tih a ni a. Ruihhlo la leh tawlh thin dan lova ramri kan lui fote chu VLTF te'n thuneitute hnenah thlen se, a tul anga hmalak thin nise tih a ni bawk.

He hunah hian SDO Sadar Pu Lalnunfela Chawngthu hnen atangin MCPC Act, 2020 chungchang inzirtirna ngaihthlak a ni a. VLTF hruaitute hnen atangin ramri ven chungchanga hmalak dante leh rawtna hrang hrangte ngaihthlak a ni bawk.

Vawiin meeting-ah hian Addl. DC Pu Henry C.Lalrawnkima, Addl. SP Pu C.Lalengliana, Official dangte, YMA hruaitute leh Myanmar ramri kai bul khaw hrang hrang VLTF hotute an tel a ni.