No.1074/2021-2022

Aizawl, 22nd June, 2021 : Higher & Technical Education Minister Dr. R. Lalthangliana chuan vawiin khan Mizoram University Vice-Chancellor leh Mizoram chhunga College hrang hrang Principalte hnenah lehkha thawnin kum 2021-2022 academic session atan seat siam belh turin a ngen.

A lehkhathawnah Higher & Technical Education Minister chuan hripui leng vangin khawvel pumpuiah harsatna kan tawh thu sawiin, a bik takin zirlaiten an tawrh nasat thu leh, zirtirna kalphungte pawh thlak danglam a ngaih tak hial avanga zirlaite leh zirtirtute tan pawh thil buaithlak tak a nih thu a sawi a, kum kalta lamah pawh hripui avanga zirlai Mizorama rawn haw tangkhangte tana seat siam belh tura a ngenna an tihhlawhtlin sak avanga lawmthu sawiin, kuminah pawh hripui leng avangin zirlai HSSLC leh Degree Course hlawhtling taka zir zote zingah kum danga phai lama zirna sang chhunzawm tur ang chi a ngaih zirlai thahnem tak chu chhuak thei lovin hun khirh tak an tawng mek a ni, tih a sawi a. Zirlaite hmakhaw ngaia a theih ang anga zirlaiten zirna sang zawk an chhunzawm theihna tura seat siam belh dan tur kawng dap turin a ngen a, class room siam belhte pawh a ngaih hial tur thu sawiin zirlaite beidawng leh rilru hah taka an awm lohna tura theihtawp chhuah turin a ngen a ni.

Minister hian Mizoram University Vice-Chancellor bakah Sawrkar, Private leh kohhran enkawl College hrang hrang Principalte hnenah ngenna lehkha hi a thawn chhuak a ni.

Mizoram University Vice-Chancellor Prof. KRS Sambasiva Rao chuan vawiin la la khan Minister lehkha hi rawn chhanglet nghalin theihtawp chhuaha hma an lo lak nghal tur thu a rawn hrilh a ni.