908/2023-2024

Champhai, the 24th June, 2023: District Level Remna Ni Celebration Committee, Champhai District leh Champhai District Arts Society (CDAS) tangkawp buatsaihin vawiin khan BRC Training Hall, Kahrawt Veng, Champhaiah 'Remna leh Muanna hlutzia tarlanna' tih thupui hmangin lemziahsiak 'Painting Competition' buatsaih a ni.

A khuhhawnna hun tawi hmanah DIPRO Champhai Dr. Lallawmkima chuan kalkhawmte lawmna thu sawiin, Painting Competition buatsaih a nih chhnante a sawifiah a. Pi C.Laltanpuii, Secretary, Champhai District Arts Society (CDAS) chuan thupui thlan 'Remna leh Muanna hlutzia tarlanna' tih a sawizau a,  painting competition atana inkaihhruaina duan leh endik dan turte a sawifiah hnuah Remna Ni 2023 pual Painting Competition buatsaih hi tan a ni.

Painting competition hi open category leh on the spot painting hmanga buatsaih a ni a. Remna Ni Pual Painting Competition pakhatna hian Rs 3,000/-, pahnihnain Rs 2,000/- leh pathumnain Rs 1,500/- an dawng dawn a. Heng bakah hian mi pahnih tan Consolation prize Rs 500/- pek a ni bawk ang. Lawmmante hi Remna Ni lawmna hun June ni 30, 2023 a Kahrawt Community Hall-a neih turah sem chhuah a ni ang.