PU LALRINTLUANGA SAILO, DAMPA BIALTU MLA-IN HREICHUK KHUA-A RANCHAW SIAMNA HMUNPUI HAWNG
909/2023-2024
Mamit 24th June, 2023 : Pu Lalrintluanga Sailo, Dampa bialtu MLA, Deputy Govt. Chief WHIP chuan vawiin khan Hreichuk khua-a ranchaw siamna hmunpui (Hreichuk Feed Mill) chu khuallian niin a hawng.
Khuallian chuan a bialchhung khua Hreichuk-ah Ranchaw atana Vaimim herna khawl Co-operative Department kaltlanga neih theih a ni ta chu thil lawmawm tak a ni a, he khawl neih a nih theih nana hmalatu Department leh Hreichuk khawtlang leh Piggery Society- te thawhrimna chu a fakawm hle a ni a ti. Vaimima kan intodelhna tura chin uar a tamtak thar chu Sawrkar Flagship Programme nen pawh a inhmeh hle a, theihtawpchhuaha hlawhtlinpui ngei tura kalkhawmte chahin, kuthnathawh hi a zahawmin theihtawpchhuah chuan hlawhtlinna ropui tak kan hmu thei a ni a ti.
Khawlin a her tur a Raw Material Vaimim chu Hreichuk khua mai bakah khaw thenawm atanga chawlut a, Ran chaw bakah Vawksa Mizoram hmun hrang hranga an hralh theih nan duhsakna a hlan bawk a ni.
Pu Lalthangfala, District Co-operative Officer, Mamit pawhin thu sawiin Vawkchaw siamna hmun Hreichuka siam a ni ta chu lawmawm a tih thu a sawi a, District Co-operative Office, Mamit atanga cheng nuai 7 leh Subsidy cheng nuai 2 hmanga ranchaw herna khawl leh a hmun sakna hi Hreichuk Piggery Co-operative Society Ltd. te hnenah pek a nih thu a sawi.
He hunah hian Pu Onesim Lalruatsanga, Secretary, Hreichuk Piggery Co-operative Society Ltd. chuan Technical report pein Society hi kum 2021 January, Ni 21 -ah din niin member 28 an awm mek a, Integrated Cooperative Development Project (ICDP) atangin Loan cheng nuai 7 hmanga khawl hi din a ni. Nikhatah Quintal 10 her chhuah theih a ni a, khawl hian unit dryer leh packing-na hmanrua a keng tel a ni.
He hun hi Pu Lalnunzira, Chairman, Hreichuk Piggery Co-operative Society Ltd. chuan kaihruaiin Pu C. Lalchungnunga, VCP Hreichuk chuan kalkhawmte lawmna thu a sawi a ni.
