India ramin mahni puala  danpui siam aneih champha hriatrengna India Republic Day 2019 lawmna chu tukin zing dar 8 khan Champhai DC Office tualzawlah neih a ni a. He hunah hian Champhai District Bawrhsap  Dr. Naveen Aggarwal, IAS chu khuallian niin hnam puanzar pawtpharhin zahna chibai a buk.

Khuallian chuan Republic Day pualin Champhai District mipuite leh Sawrkar hnathawkte chibai a buk a. Republic Day chu India   Constitution duanchhuaha hman anih hriatrengna ani a, India danpui duangchhuaktu Pu B.R Ambedkar chu a hnathawh ropui tak avanga hriatreng  a pawimawh a ni, a ti a. India mi sakhua, hnam leh rinna hrang hrang vuantute inpumkhat  thlatna  chhan chu India khua leh tui vek kan nihna hi ani tiin, Delhi tlang atanga kilometre 2500 a hlaa  awm ni mah ila kan zain hnam khat leh unau, India mi vek kan ni, a ti a.

Dr.  Naveen Aggarwal chuan India ram hmun hrang hrang a fan tawh thu leh Mizoram ngeiah pawh kum hnih chhung hun alo hman tawh thu a sawi a. Mizoram chhuanawm bikna em em chu hmun ralmuang leh lehkhathiam tamna ani hi ani, a ti a.   State  fai leh inthununna tha tak nei anihna chu State dang mite pawhin entawn se, Mizote atanga faina, intluktlanna leh thil  tha dangte zir se a duhpui thu a sawi a.

District Bawrhsap chuan Sawrkarin mipuite hmakhua ngaiin  hamthatna hrang hrang a chhawpchuah thin thu tarlangin, chung zingah chuan Ration-te, Mirethei insakna, terrace, tuikawng, ni za inhlawhna  leh a dang dangte awmin sawrkar thar pawhin chak taka hmalak chhunzawm  zel a tum thu a sawi a. Mipuite chu sawrkar atanga tanpuina leh hamthatna chauh beisei lova mahni kutke a din tum thin turin a chah a. District mipuite chu an thawhchhuah ang angte mamawh huna hman mai theih tura dahthat  nachang hre tura fuihin, sum leh pai vawnthat khiaute chu fate zirna, sumdawn bul tanna leh damloh nikhua atan te a tangkai dawn a ni, a ti a. Zirna kawngah Zirlai naupangte kaihhruai chu nu leh pa ten veia, nakin lawka ram leh hnam kaihruaitu tur an nih avangin   tun hun chauh nilo zirna sang zawk an zawh thlenga hmathlir neihpui angaih thu a sawi a. Zirna sang zawk leh eizawnna tak tak dap turin tawng chi hnih, chi thum tal thiam angaih avangin Zirlai naupangten  Saptawng an thiam bel theihna turin Sikul leh In lamah te darkar thum ve ve tal Saptawnga  tawng thin nise a hlawk hle dawn a ni tiin, hemi kawngah hian Zirtirtu, Nu leh pa leh naupangte tanrual a ngai dawn a ni, a ti a.

Khuallian chuan Champhai District chu ramri depa awm anih avangin ruihhlo leh a kaihhnawih a hluar thu te, damdawi hman sual tam ta lutuk chu a vei thu sawiin, Champhai District mipuite chu hemi laka inthiar fihlim tum turin a fuih a. Taima le rinawm taka hnathawh chu Pathian duhdan leh amah biakna chi khat anih tih hre thara, I ramin engnge a tih sak theih che tih zawt hmasa lova, enge ka ram tan ka thawh ve theih ang tih thinlung pua hnathawh tum theuh turin District mipuite a sawm nghal a ni.

Vawiin Republic Day lawmna hunah hian DC office leh SP Office a thawk Officer-te leh chanchinbumite an tel a ni.