Nimin khan Health Minister Dr. R. Lalthangliana'n Falkawn a Mizoram Institution of Medical Education & Research (MIMER) a tlawh a, Minister hi Dr. Z.R.Thiamsanga, MLA bakah Pu Lalrinliana Fanai, IAS, Commissioner & Secretary, Health & Family Welfare, Health Principal Director leh Director ten an tawiawm a ni.

Minister chuan Medical College Mizoram tana neih hi mimal amg pawh a tunhma atanga a ngaihpawimawh anih thu leh neih a tul zia Assembly House a auchhuahpui hmasatu ni hiala a inhriat thu a sawi a, a hlawhtlinna turin Sawrkar lo awm tawh te pawhin theihtawp an chhuah thin a, an hmalakna te a fakawm rualin vawilehkhatah engkim an ngaihtuah vek seng lova, tihbelh ngai leh hmalak chhunzawm ngai tam tak a awm a, heng te hi kan hlamchhiah dawn lova a tha tur anih chuan sawrkar hmasa hmalakna te pawh chhunzawm zel ani ang a ti.
MIMER chungchang sawizawmin Society anga kalpui hi a tha ber em tih uluk taka ngaihtuah a ngai a, hemi ngaihtuahtu tur Committee pawh din anih tur thu a sawi a ni. MIMER chu Mizoram hmel titha tu ni turin theihtawp chhuah a tum thu sawiin hmanraw mamawhte pawh a tha thei ang bera thuam anih bakah a enkawltu tur pawh khawl chinchang hria mithiam rawih zel  atul thu a sawi a, MIMER a thawk Mizoram pawn atanga lo kal te pawh thlamuang tak leh lungsi taka thawk tura chahin an mamawh te ngaihtuahsak an nih tur thu a sawi a ni.
Minister hian MIMER Academic Building thar tur sak mek leh Anatomy Department bakah Boys Hostel leh Girls Hostel luah lai mek a tlawh a, hei bakah hian Boys Hostel leh Girls Hostel sak lai mek tlawh bawkin a satu Contractor te pawh a kawm a, Zoram rotling an khawih avangin uluk tak leh rinawm taka chhuan tlaka hna thawk turin a hrilh a, Academic session thar reilote ah tan anih leh mai dawn avangin an hnathawh quality tichhe chuang si lova  chak tak a thawk turin a hrilh a, MIMER tihhmasawnna tur Master Plan siam a tul thu a sawi bawk.

Minister hian MIMER a MBBS zirlai hmasa ber 1st batch te kawmin MIMER hlawhtlinna chu anmahni ah a lang dawn a ni a ti a, Khawvel hmun hrang hranga thawk tlak Export quality nei turin tan la turin a fuih a, an harsatna leh mamawh te inthlahrung hauh lova a hnena thlen thin turin a chah a ni.