Nimin tlai khan Health & Family Welfare Minister Dr. R. Lalthangliana chuan Falkawna Mizoram  College of Nursing (MCON) a tlawh a, zirtirtu te leh zirlaite nen inkawmhona hun tha tak an hmang.

MCON a nurse zirlai leh zirtirtu te hma ah thu sawiin Health Minister chuan zirna in (institution) neih hi a that rualin mihring quality tha kan chherchhuah loh chuan awmzia a awm lova, chutih karah MCON chu la naupang te mah nise a chhuanawmzia an zirlai chhuakta te ah a hriat ani a ti a, Mizoram leh India bakah Singapore, England thlengin MCON atanga zirchhuak ten hna an thawk ani tih a hriatin a lawm thu a sawi a, certificate nei satliah nilo, damlote pawhin an thlamuanpui theih ni tur khawpa inzirchhuah tum turin zirlaite a fuih a ni.

Minister hian MCON tihchangtlun kawngah theihtawp chhuah a tum tih a sawi a, a panna kawng zim lutuk chu a vei thu sawiin a laih zau dan tur ngaihtuah vat a ngai ani a ti a, PWD te nen a rang lama hmalak dan tur sawiho ani ang a ti a, Library tihchangtlun a ngaihpawimawh thu leh Library enkawltu indaihlohna pawh a rang lama chinfel anih tur thu a sawi a, MCON in harsatna leh mamawh an neih dang te pawh a tul anga zirchian a hma lak anih tur thu a sawi a ni.

Minister tawiawmtu Dr. ZR Thiamsanga pawhin Daktawr hna a thawh laiin MCON ah hian amah ngei Guest Lecturer ah a tan thin thu a sawia, MCON chu India ramah pawh zahpuiawmlo anih thu sawiin hmasawn zel turin duhsakna a hlan a ni.

MCON ah hian kum 4 course BSc Nursing zirna kalpui a ni a, academic year khatah seat 30 zel awmin tunah hian zirlai 120 an awm a, a din tirh atanga tun thlengin Nurse 258 in an zir chhuak tawh a, heng zirlai zirchhuakte hi Mizoram chhunga hospital hrang hranga an thawh bakah Singapore ah 20 chuangin an thawk mek a, London ah 3 awmin India ram damdawiin tha AIIMS ah leh damdawiin hrang hrangah thawk an awm mek bawk a, MCON atanga zirchhuak MSc Nursing zir zo tawh 5 an awm tawh bawk a ni.